Shillong, Risaw 01
Ka HK Singh Memorial Secondary School, Jowai kaba mihkhmat ïa ka jylla Meghalaya sha ka lympung 62nd Edition jong ka Subroto Cup International Football Tournament Under-14 (Sub Junior Boys) kaba long ha Bengaluru, Karnataka ka la sdang ïa kane ka lympung da ka jingjop.
Haba phai sha ka jingïalehkai kaba la long ha ka sngi U Blei, ka HK Singh Memorial ka la khur ka jingjop da kaba jop da 3-0 kol ïa ka Sainik School.
Kane ka nam jop jong ka HK Singh (Meghalaya) ïa ka Sainik School kala ai mynsiem ïa ka kynhun baroh kawei bad ba kin nanglah ban ïalehkai bha ha ki jingïakhun kiban dang wan.
Hadien jong kane ka jingjop, ka HK Singh Memorial kaba hap ha ka Pool A, mynta kan hap ban pynkhreh ban ïakhun pyrshah sa ïa ka KVS kaba na Tripura bad ka NVS. Ka jingïakhun kaba ar jong ka HK Singh Memorial kan long ha ka 2 tarik Risaw pyrshah ïa ka KVS.
