Washington, Risaw:
Ka tnat Royal Canadian Mounted Police (RCMP) jong ka Canada ha ka Sngi Thohdieng ka la pyntip ba ka jingwad bniah halor ka jingshah pyniap u lehnoh Khalistan u Hardeep Singh Nijjar ka dang iaid shakhmat bad haduh mynta ym pat shym la lap ia ki sabut ba ka India kan ïadon bynta ha katei ka jingpyniap ia utei u lehnoh hapoh Canada.
U Nijjar, u long u heh nongialam jong ka kynhun lehnoh ba la shah khang pyrshah- ka Khalistan Tiger Force (KTF) bad u la shah pyniap ha Surrey jong ka British Columbia ha ka 18 tarik u Jylliew jong une u snem 2023. Ka India ka la jer kyrteng bad ñiew ia u Nijjar kum u lehnoh naduh u snem 2020 ba la lap ia ka jingthmu thombor jong u hapoh u pud- u sam jong ka India ha utei u snem.
Kumta, la ong ba ka kynhun Integrated homicide Investigation Team (IHIT) jong ka RCMP ka dang pyniaid shakhmat ia ka jingtohkit bad jingwad bniah ban lap ia ka jingshisha bad ia kiba don kti ha ka jingpyniap ia utei u lehnoh, uba long u nongshong shnong trai jong ka Canada.
