Shillong, Risaw 01
Hadien ka jingïashim bynta bad ïoh ïa ka jingjop ha ka jingïakop mareh ha ka Sohra Marathon, i Meiieit Kmoin Wahlang mynta in pynkhreh pat ban leit ïashim bynta sa ha ka jingïakop mareh marathon ka ban long shen ha nongbah Delhi mynta u bnai Risaw, 2023.
I Meiieit Kmoin ba la dap 75 snem ka rta na ka shnong Shngimawlein kaba hap ha South West Khasi Hills District, i la pynpaw ïa ka jingkmen kaba khraw hadien ba i la ïoh ïa ka jingjop da kaba wan ha ka kyrdan ba nyngkong ha ka jingïakop mareh Veteran Above 55 Years 10K Run jong ki kynthei ha ka Sohra International Half Marathon kaba la long ha ka 30 tarik u Nailur 2023 ha Sohra ha kaba i la lah ban pyndep ïa ka jingmareh ha ka por kaba long 51 minit 37 sekhon.
Lyngba kane ka jingjop, i Meiieit Kmoin iba la don haduh 12 ngut ki khun bad 52 ngut ki khun ksiew, i la ïohpdiang ïa ka khusnam pisa kaba long 20 hajar tyngka.
Lah ban pynkynmaw ba i Meiieit Kmoin i dei iwei na ki nongmareh marathon iba la paw bha ym tang hapoh ka jylla Meghalaya hynrei wat shabar ka jylla, ha kaba i la khur bun tylli ki jingjop ha ki jingïakop bapher bapher.
