Montevideo, Risaw:
Katkum ki khubor la ong da ki spah tylli ki ksih duriaw ki la iap lut ha ki bynta rud duriaw jong ka Uruguay ha kine ki taiew namar ka jingpur jong ka khlam ‘Bird flu’ ha katei ka bynta. Tat haduh jong ka Sngi Saitjaiñ ba la ioh lum kaiphod, la shem ba ki don kumba 400 tylli kitei ki jait mrad um kiba la shu iap khlam ha kylleng jong katei ka duriaw.
Kumta, la ong ba bun ngut ki heh Myntri jong katei ka ri ki la leit ban peit thuh ia katei ka jing-iap khlam ki mrad na ka jingpur bad jingsaphriang jong ka jingpang khlam ki sim ka ‘H5 Bird Flu’, kaba la shem ha kitei ki ksih kiba don ha ka rud duriaw Montevideo.
Kitei ki mrad ba la shu iap khlam, ki la shu per ha kylleng sawdong ki bynta jong ka Atlantic Coast bad ha ki wah kiba tuid sha katei ka duriaw. Tad haduh jong ka step Sngi Saitjaiñ, kumba 350 tylli ki ksih la dep ban tep noh khnang ban iada bad tehlakam ia ka jingpur bad jingsaphriang jong katei ka jingpang khlam sha ki mrad kiba don ha ki shnong ki thaw bad ki jing-ri kiba ri ha ki shnong briew.
Ka Uruguay ka don da kumno- kumno, kumba 3,15,000 tylli ki ksih ‘Seal’ bad ‘Sea Lion’.
Kumta, ki tnat ka koit ka khiah jong katei ka ri ki la maham ia ki paidbah ba kin kiar na ka jing-leit sha kitei ki bynta ba jur katei ka jingpang khlam namar ka lah ban pur sha ki briew ruh lada ka jingpang ka la khlaiñ bad jur bha.
