Tokyo, Risaw:
Uwei u nongpeit jong ka jaka ri mrad ne ‘Zoo’ ha ka park kaba don hapoh Japan, u la duh noh ia ka jingim hadien ka jingshah thombor ha u sing uba don ha katei ka jaka katba u dang pyrshang ban pynrung ia utei u sing hapoh jong ka ruh ‘Cage’ kaba u dei ban shong.
Ia utei u briew la tip kum u Kenichi Kato, uba la don 53 snem ka rta bad uba la trei la slem ha Tohoku Safari Park kaba don ha ka thaiñ Fukushima. Ha ka Sngi Palei la shem ba utei u briew u la mynsaw jur bad phlei snam na ki bynta jong ka ryndang bad uba la thiah iapler hapoh jong katei ka ruh ba la dei ban set ia utei u sing.
Kumta, la suba ba utei u briew u la shah dait ha ka por katba u dang leit ban ai bam ia utei u sing ha katei ka jaka shong jong u.
U heh nongkhmih jong katei ka park u la iathuh ba u Kato ha katei ka sngi, u dang pyrshang ban pynbiej bad pynrung ia utei u sing hapoh ka ruh da kaba pynbiej da katei ka doh kaba u leit rah.
La ong ruh ba ki nongtrei bad nongpeit jong katei ka jaka ri mrad, haba ki leit ai bam, ki ju plie ia ka jingkhang jong ka ruh ba set ia ki mrad, ki buh ia ka jingbam bad tang mar ia dep buh ia ka jingbam, ki la khang biang noh ia ka jingkhang jong ka ruh.
Hynrei ha katei ka jingjia, ym lah ban tip ha kano ka dur ba utei u nong-ap u shah dait wat haba u la ai da ka bam kaba u la leit rah kyrpang ban ai bam ia utei u sing.
