Shillong, Risaw 01
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, kata ha ka First Division, ka jingïakhun hapdeng ka Bara Football Club pyrshah ïa ka Phudbyrnei Sports Club ka la long kaba itynnad bad ïakhaid bha hynrei ha kaba kut, ka Bara FC ka la jop ïa kane ka jingïalehkai da 4-2 kol.
Ha kane ka jingïakhun ki rangïalehkai na baroh ar liang mamla ki la ïakhun tyngeh bad dei ka Bara FC kaba la ïoh ban khyrwit nyngkong haduh 3 tylli ki kol, kita ba la thep da u Ricky Jaba ha ka minit ba 6, u Nangehbok Jaba ha ka minit ba 32 bad u Banshembhalang Jaba ha ka minit ba 39 hynrei shwa ban wai ka kylla step, ka Phudbyrnei ka la ïoh pynphai shi kol lyngba u Phiding Kharwanniang ha ka minit ba 43.
Haba bteng ïa ka kylla miet, ka Phudbyrnei ka la ïoh thep ïa ka kol kaba ar ha ka minit ba 85 lyngba u Wanshanbok Jyrwa hynrei ka kol ba la thep da u Wudlang Jaba ha ka minit ba 88 ka la biang pura ïa ka Bara FC ban khur ïa ka jingjop.
Haba phai sha ka jingïalehkai jong ka kyrdan Second Division, ka Wahlyngkien Ramklang Sports Club ka la lah ban pynliem noh ïa ka Nongwah Sports Club da 2-1 kol. Ïa ki kol jong ka Wahlyngkien la ïoh ban khyrwit da u Wanshilong Kharhunai ha ka minit ba 17 bad u Aiborlang Kharhunai ha ka minit ba 58, katba ïa ka shi kol jong ka Nongwah la thep da u Armishal Khasain ha ka minit ba 15 kaba la wan lyngba ka jingshut penalty.
Ha ka jingïalehkai ha ka Third Division pat, ka Mawdngong Sports Club ka la lah ban pynliem noh ïa ka Mawshiton Sports Club da 2-0 kol. Ïa ki kol la thep da u Mebankhraw Kharshiing ha ka minit ba 35 bad u Bankitlang Kharshiiing ha ka minit ba 54 ba la wan lyngba ka jingshut penalty.
Ki jingïalehkai ban wan jong kane ka lympung, kin long ne bteng biang pat ha ka 2 tarik u Risaw, kata ka jingïakhun ha ka First Division kan long hapdeng ka Umkseh Sports Club pyrshah ïa ka Pyndenumbri Sports Club, ha ka Second Division pat ka Thainthynroh Sports Club kan ïakhun pyrshah ïa ka Mawrohroh Sports Club bad ha ka Third Division pat ka Mawsingshad Sports Club kan ïakhun pyrshah ïa ka Laitmawpen Sports Club.
