Shillong, Risaw 01
Ka Laitumkhrah Sports Club, Mawlyngngad Sports Club, Ïatyllilang Sports Club, Pommura Sports Club bad ka Umsohsun Sports Club ki la khur ïa ka jingjop ha ki jingïalehkai jong ka lympung SSA U-20 4th Division Football League 2023, kaba la pynlong ha madan 3rd Ground MFA Turf Polo ha ka sngi Saitjaiñ.
Katba ka jingïakhun hapdeng ka Laitlulong Sports Club pyrshah ïa ka Lamlynti Sports Club (Sohïong) ka la kut noh ha ka jingïakhaid khlem don ba lah ban pynkhih jar.
Haba phai sha ka jingïalehkai kaba nyngkong, ka Laitumkhrah SC ka la lah ban pynliem noh ïa ka Madanrting Sports Club da 4-0 kol. Ïa ki kol jong ka Laitumkhrah la ïoh ban khyrwit da u Amosly Nongbri ha ka minit ba 14, u Nangtei Kharbangar ha ka minit ba 22, u Hamlet Thabah ha ka minit ba 48 bad 57.
Haba phai sha ka jingïalehkai kaba ar, ka Mawlyngngad Sports Club ka la lah ban pynliem noh ïa ka Mawñianglah Youth Sports Club da 3-2 kol. Ïa ki kol jong ka Mawlyngngad la ïoh ban khyrwit da u Badonbok Mawthoh ha ka minit ba 34, u Banskhembok Wanshong ha ka minit ba 43 bad u Freddy Khriemmujat ha ka minit ba 49, katba ïa ki kol jong ka Mawñianglah la thep da u Helibert Nongkhlaw ha ka minit ba 8 bad u Aibanjingshai Lyngdoh ha ka minit ba 26.
Ha kawei pat ka jingïalehkai, ka Ïatyllilang Sports Club ka la lah ban pynliem noh ïa ka Dilingiem YSCWA da 3-1 kol. Ïa ki kol ka Ïatyllilang la thep da u Shwameiaki Kharumnuid ha ka minit ba 3 bad 8 bad u Banpyndap Ryndong ha ka minit ba 10 bad ïa ka shi kol ka Dilingiem YSCWA la thep da u Rijoylang Syiemlieh ha ka minit ba 55.
Ha ka jingïakhun kaba san, ka Pommura SC ka la lah ban pynliem noh ïa ka Laitkroh Sports Club da 3-1 kol. Ïa ki kol jong ka Pommura la thep da u Kitborlang Kharkongor ha ka minit ba 39 bad 55 bad u AndyStar Kharsati ha ka minit ba 60. Ïa ka shi kol jong ka Laitkroh pat la thep da u Telling Nongkynrih ha ka minit ba 59.
Ha ka jingïalehkai ba khatduh jong kane ka sngi, ka Umsohsun SC ka la lah ban pynliem noh ïa ka Lummawbah Sports Club da 4-3 kol. Ïa ki kol jong ka Umsohsun la thep da u Donkamlang Marngar ha ka minit ba 42, u Gedion Mawiong ha ka minit ba 45, u Aaron Dohling ha ka minit ba 54 bad u Ibanroi Shangdiar ha ka minit ba 66. Ïa ki kol jong ka Lummawbah SC pat la thep da u Mewanshngain Ryntathiang ha ka minit ba 35 bad 50 bad u Kevinkupar Royne ha ka minit ba 48.
Ki jingïalehkai ban long ha ka sngi Nyngkong ka 2 tarik pat ha kane ka lympung, kan long hapdeng ka Krang Sports Club pyrshah ïa ka Nongmynsong Sports Club ha ka por 4.45 janmiet.
