Shillong, Risaw 01
Ka Tura District Cricket Association (DCA) ka la ïoh ban rah ïa ka nam kum ka lahduh jong ka lympung U-19 Boys Inter District Cricket Tournament ka Megha-laya Cricket Associa-tion’s (MCA) hadien ba ka lah ban pynliem noh ïa ka East Garo Hills da 6 wiket ha ka jingïalehkai final kaba la long ha Salpara, Mendipathar ha ka sngi Saitjaiñ.
Kum ban shu pynkynmaw, ka East Garo Hills ka dei ka kynhun kaba khlaiñ bad ka bym shym pat shah pynliem ha shwa jong ka final. Kane ka kynhun ka la jop lut baroh ki jingïalehkai ha ka Group kynthup ka jingïalehkai pyrshah ïa ka Tura ha shuwa ban pynliem ïa ka Shillong Cricket Association ha ka semi final.
Haba kam trai ban tied nyngkong hadien ba la jop ka jingkynting pisa, ka East Garo Hills ka la lah ban kamai tang 89 run na ki 32 tylli ki overbad hap lut ki wiket. Haba beh ïa kane ka thong kaba rit, ki nongtied ka Tura kila lah ban kot tang ha ka over kaba 10.1 bad hap tang 4 wiket.
U Chandra Thapa u la lah ban khur 3 wiket bad ai tang 18 run, u Yash Mishra u khur 2 wiket bad ai 12 run na ki 3 overs, katba u Thunun N Marak u la lah ban kamai 20 run.
Ka jinglah jong ka Tura ka la wan lyngba ka jinglah ban ïalehkai bha jong u Shahin Alom uba la tied marwei haduh 42 run na ki 43 tylli ki bol hynrei u la duh noh ka wiket ha u nongkawang bol ka EGH u Gulgul Sangma uba la khur 2 wiket bad ai 16 run na ki 7.5 over.
Ha kane ka sngi pynkut, ïa kane ka jingïalehkai final la wan ban sakhi da ki rangbah nongïalam ka MCA bad ki nongpynïaid jong ki club kiba la ithuh da ka MCA, kiba la aiti ïa ki khusnam sha ka Tura DCA da u President ka MCA u Naba Bhattacharjee bad ïa ka EGH la sam da u Joint Secretary ka MCA u Chiang D Shira.
