Islamabad, Risaw:
Katkum ka kaiphod ba la ioh lum da ka World Bank, la ong ba kumba 40% na ki paidbah nongshong shnong ka Pakistan, ki dei kiba hap hapoh jong ka ‘Poverty Line’ lane kiba dang duk bad im hapdeng ka jingkyrduh.
Kane ka long katkum ka jingpyllait khubor jong ka kotkhubor na Pakistan- ka ‘Dawn’.
Kumta, la ong ba ka Pakistan haduh mynta ka donkam ban pynkhlaiñ ia ka ioh-ka kot jong ka khnang ba kiba bun ki nongshong shnong jong katei ka ri kin lait na ka jingduk- jingkyrduh bad iap thngan.
La ong ba ki tnat ba nabar ki la maham ia ka Pakistan ba ka dei ban phai khmat sha kane ka bynta khnang ba kan lah ban khyllie khlieh biang noh naduh ka por ba sdang. Kane ka jingmaham ka long ruh ha kum kane ka por katba ka Pakistan ka dang pynkhreh bad pyn-ap ban ioh ia ka ilekshon bad ka sorkar ba thymmai ha une u snem ban wan. Kumta la ong ba ka sorkar ka ban synshar thymmai ha Pakistan ka dei ban peit mat noh bad ban leh eiei noh tang mar ia ioh synshar khnang ba ka Pakistan kan lait na ki jingeh bad jingkyrduh.
Ka World Bank ka la kyntu ruh ia ka Pakistan ba kan pynmih khajna lyngba ka rep- ka riang bad na kiwei de ki liang, kumba 7% katkum ka jingheh jong ka ioh- ka kot bad ka jinglah ban mih ia ka jingioh nong ha kino- kino ki tnat, kum shi bynta ban pynkhie im biang ia ka ioh ka kot jongka ha kine ki snem ban wan.
Kumta, la ong ba ha katei ka kaiphod, la paw shai ba ka jingduk jingkyrduh hapoh Pakistan ka la jan long mar shiteng ia ka jingdon ki briew hapoh jong katei ka ri bad kane ka la ktah jur ia kito ki paidbah kiba don ha katei ka kyrdan bad kiba jynjar wat ban ioh ia ka bam- ka dih bad ki jingdonkam ba ki dei ban ioh kum ki briew.
