Shillong, Risaw 01
U Myntri ka tnat ki kam ïalehkai ka jylla u Bah Shakliar Warjri u la pynpaw ïa ka jingkhmih lynti ban lah pynlong man la u snem ïa ka jingïakop mareh ba la tip kum ka Sohra International Half Marathon.
Haba pynpaw ïa kane ha ka jingsam khusnam sha ki nongjop kiba la wan ban ïashim bynta ha ka 2nd Sohra International Half Marathon kaba la pynlong ha ka sngi Saitjaiñ ka 30 tarik u Nailur 2023 ha Sohra, u Bah Shakliar u la pynpaw ka jingsngewkmen ban ïohi ïa ka jingtuid ki nongïashim bynta kiba la kot shaduh ka 3140 ngut kiba la wan na kylleng ka ri India, lem bad 6 ngut ki nongmareh kiba na ka ri Kenya.
U Myntri u la ong ba kane ka jingmareh marathon ym tang ba ka khring ïa ki briew ba nabar hynrei ka ïarap ban pynïoh ïa ka met ba koit bakhiah bad kumjuh ban kyntiew ha ki kam jngohkai.
Shuh shuh u la ong ba nalor ka Sohra Marathon, ka sorkar Jylla lyngba ka tnat ïalehkai kan pynlong ruh ïa kiwei pat ki marathon ha kylleng ki district jong ka Jylla.
