Shillong, Risaw 01
Ka Meghalaya Cricket Association (MCA) ha ka Sngi U Blei ka la pynbna ïa ka thup kyrteng jong 15 ngut ki rangïalehkai kriket ki ban leit ïashim bynta ha ka lympung BCCI’s U-23 Men’s State A Trophy.
Ha kane ka lympung ka Meghalaya kan hap ban ïakhun haduh hynriew tylli ki jingïakhun jong ka group ki ban long lut baroh ha Chandigarh naduh ka 28 tarik u Risaw. Ki jylla kiba ka Meghalaya kan hap ban ïakhun pyrshah ki kynthup ïa ka Uttar Pradesh, Rajasthan, Assam, Andhra Pradesh, Bengal bad Railways kiba dei ki jylla kiba khlaiñ bor bha.
Na ka bynta kane ka lympung, kan don ruh ka jingkilan met kum ka jingpynkhreh ïa ka kynhun ka ban long naduh ka 15 haduh 24 tarik mynta u bnai ha nongbah Shillong. Kumta la kyrpad ïa ki nongïarap, ki rangïalehkai bad kito kiwei na bar jong ka district ba kin wan ai jingtip noh ha ka 14 tarik. Kane ka kynhun ïalehkai ka Jylla kan sa mih na jylla ha ka 25 tarik Risaw ban leit sha Chandigarh.
Ki kyrteng jong ki rangïalehkai ka Meghalaya ki long u Abhishek Gupta, Nishanta Chakravarty, Manish Sharma, Md Asif Khan, PM Santhosh, Aaron A Nongrum, Badonnam J Mylliemngap, Joydeepan Deb, Sudhir Sahani, Kevin Sanjeev Christopher, Raghav Magotra, Agreas Chamcham A Sangma, Aryan Borah, Sachin Kumar, Appante Waldora A Sangma.
Ki rangïalehkai ba la pynkhreh lypa pat ki long u Mrinal Das, Wankitlang Nongpluh, Abhishek Kumar bad u Kush Agarwal bad ki nongïarap ka kynhun pat ki long u Neetesh Sharma (head coach), Synrapsing Riatham (assistant coach), Skhembor Khongbtep (trainer), Emidao Dhar (physio), Wonderful Pakyntein (manager).
Ki jingïalehkai kiba ka Meghalaya kan ïakhun ha katei ka lympung ki long, kata ha ka 28 tarik Risaw pyrshah ïa ka Uttar Pradesh, ha ka 30 tarik Risaw pyrshah ïa ka Rajasthan, ha ka 1 tarik Naiwieng pyrshah ïa ka Assam, ha ka 5 tarik Naiwieng pyrshah ïa ka Andhra Pradesh, ha ka 7 tarik Naiwieng pyrshah ïa ka Bengal bad ha ka 9 tarik Naiwieng pyrshah ïa ka Railways.
