Geneva, Risaw:
Katkum ki khubor la ong ba ka bynta khappud jong ka Mexico bad United States ka long kaba ap jingma haduh katta ia ki phetwir, ha kaba ha u snem 2022 ki don palat 700 ngut kiba khlad bad jah rngai na ka jingiaid lyngba na katei ka bynta khappud.
Katkum ka kaiphod jong ka International Organization for Migration (IOM), la ioh jingkheiñ ba ki don 686 ngut ki phetwir kiba khlad hadien ka jingiaid lyngba na khappud jong ka United States bad Mexico hapoh u snem 2022. Kane ka pyni ba katei ka bynta khappud ka long kaba ma tam napdeng baroh ki khappud ha ka pyrthei.
Haba la kynthup lang baroh, ki don kumba 1,457 ngut ki phetwir kiba la khlad bad jah rngai ha ka jingrung jongki na ki bynta khappud ha kylleng ki bynta jong ka America hapoh jong utei u snem.
Kumba mar shiteng na kitei kiba khlad, 307 ngut ki phetwir kiba khlad ha utei u snem, ki dei kiba leit rung na Mexico sha United States lyngba jong ka shyiap Sonora bad Chihuahua.
Hynrei la ong ba kane ka jingjur ha ka jingkhlad ki phetwir, ka long namar ka jingbym lah jong kitei ki ri ban pynbiang ia ki lad jingiada khatam ha ki bynta khappud.
