Shillong, Risaw 02
Ka India ka la kynjoh haduh 60 tylli ki takma ha ka Asian Games 2023 bad mynta ka la buh ïa ka thong ban khur shaduh 100 tylli ki takma haduh kaba kut kane ka lympung kaba dang ïaid mynta ha China.
Ha ka Athletics, ka India ka la bteng ban khur ïa lai tylli ki takma rupa bad kawei ka takma rnong ha ka lah sngi U Blei. Ka Parul Chaudhary ka la khur ïa ka takma rupa ha ka 3000m steeplechase bad ka Priti Lamba ka la khur ïa ka takma rnong.
Ka Ancy Sojan Edappilly ka la khur ïa ka takma rupa ha ka long jump, kumjuh ha ka mixed relay, ka India ka la wan ha ka kyrdan ba-ar.
Kham hashwa ka Sutirtha Mukherjee bad ka Ayhika Mukherjee ki la khur ïa ka takma rupa ha ka women’s doubles jong ka table tennis. Ïa kawei pat ka takma rnong la wan lyngba ka skating.
Ïa ka kyrdan ba nyngkong la khur da ka kynhun ki ‘thei ïalehkai ka ri ha ka speed skating 3000m relay bad ïa ka kyrdan ba-ar la khur da ka kynhun jong ki shynrang ha ka men’s speed skating 3000m relay.
Haba phai sha ka hockey, ka kynhun ïaleh-kai ki shynrang ka la jam sha ka semi final hadien ba ka la lah ban pynliem haduh 12-0 ïa ka Bangladesh ha ka jingïalehkai kaba khatduh jong ka Pool-A.
