New Delhi, Risaw:
U heh jong ki 360 tylli ki shnong jong ki jait bynriew Khap ha Palam ha ka Sngi U Blei u la byrngem ban pynlong da ka jingïakhih habar ka ïingsah jong u Myntri Rangbah jong ka Delhi Arvind Kejriwal bad kumjuh ha ka shlem treikam jong ki MLA ka seng Aam Aadmi Party (AAP) lada jia ba ki jingdawa ba ki la buh kim urlong shwa ka ilekshon Lok Sabha.
Ha ka ‘Mahapanchayat’ ba la pynlong da ki Khap ha Jantar Mantar ha Delhi, ki dkhot jong ka kynhun ki la buh ïa shibun ki jingdawa, kynthup ha kaba ïadei bad ka jingaikam na ka bynta ki nongshong shnong, ki jaka ki ba lah ban pynïoh jingkyrshan ïa ki khnang ba kin lah ban ïeng hala kijong ki kjat, bad ka jingmap ïa ka ram, kynthup ka khajna ba hap siew halor ki ïing, lada kylliang jaka sah bad ka jingsiew halor ka jingpynïeng kali.
Ïa ka ‘Mahapanchayat’ la pynlong ban ïakren halor ki hok jong ki nongshong shnong, ban ïakren halor ka jingktah jong ka jingpyntreikam ïa kiba bun ki khajna bad ka jingwanrah ïa kiba bun ki kyndon ha ki shnong kiba don hapoh bad ha marjan jong ka Delhi.
Ha ka por ba la don ka ‘Mahapanchayat’, u Surendra Solanki, uba long u heh jong ka Palam 360 Khap, u la pynbna ba lada ïa kine ki jingdawa ym lah ban pyntreikam hashwa ban pynlong ïa ka ilekshon Lok Sabha, ïa ka jingïakhih yn sa pynlong habar ka jaka sah jong u Myntri Rangbah bad byrngem ruh ban pynlong ïa ki jingïakhih kaba jur ha ki shlem treikam jong ki MLA jong ka seng AAP.
