Shillong, Risaw 02
Ka Ri Bhoi Water Sports & Tourism Cooperative Society kan pynlong biang ïa ka jingïakop kinglieng ha ki jaka ba long lat-lat ba la tip kum ka ‘Megha Kayak Fest 2023’ naduh 12 haduh 14 tarik mynta u bnai ha wah Umtrew hajan ka shnong Umtham, Ri Bhoi district.
Kane ka jingïakop kinglieng mynta u snem kan long kaba kham heh ha kaba la ïasnoh kti lang ryngkat ka tnat Directorate of Sports and Youth Affairs (DSYA) bad ka tnat Tourism jong ka sorkar Jylla.
Ha kane ka jingïakop kinglieng kin don ar bynta kata ka Downriver Sprint (DR) na ka bynta ki nongkinglieng kiba napoh ka Jylla kiba don 15 ngut, bad ka Indian National Championship na ka bynta ka Canoe Slalom Cross (CSLX), ka ban long ruh ka jingplie lad ruh ïa ki nongkinglieng kiba nabar ri ba kin wan ïashim bynta lang.
Ha kane ka kynti kaba mynta katei ka synjuh ka la snoh kti lang ka Indian Kayaking & Canoeing Association (IKCA) kaba hap hapoh ka jingkhmih da ka Interna-tional Canoe Federation.
U coach katei ka synjuk u Ian Vincent u la ïathuh ba ha kane ka jingïakop kan don ka jingkop na ka bynta kiba la tbit na kylleng jong ki ri ka pyrthei bad ki nongkinglieng kiba dangdonkam ban shah hikai.
“Ka jingthmu jong kane ka Festival ka long ruh shi bynta an kyntiew ïa ki kam jngoh kai abd ha kajuh ka por ka long ban pynlong ïa ka jylla Meghalaya kum kawei ka jylla kaba paw ha ka jingdon ïa ki jingïalehkai kinglieng.”
Kumba ka paw u lan Vincent, uba la ju mlien ha ka kam ïalehkai kinglieng ha ka kayaking, u la mihkhmat ïa ka Australia ha ka European Cup bd ruh ha ka World Championship.
Kane ka Ri Bhoi Water Sports & Tourism Cooperative Society ka dei kaba la seng ha u snem ba la lah, ha kaba ka la sei ïa 15 ngut ki nongkinglieng kiba na ka thaiñ Ri Bhoi bad uwei na ki u Pynshngaiñ Kurbah na ka shnong Lawbyrwa, Ri Bhoi District, u la khur ïa katei ka takma rupa ha ka jingïakop kienglieng (Canoe slalom) ha ka Khelo India Youth Games, kaba la long ha Madhya Pradesh.
