Ranchi, Risaw:
Ki la don kumba 8 ngut ki briew kiba la ïap kynthup uwei uba na Ranchi na ka daw jong ka jingjur slap bad ka jingpom jong u pyrthat ha Jharkhand ha kine ki 24 kynta ba la leit, la ïathuh ki heh pulit ha ka lah sngi U Blei.
Ki bynta kiba bun jong ka Jharkhand ki la ïohpdiang ïa ka jinghap jong u slap uba jur naduh ka janmiet jong ka sngi Saitjaiñ ha kaba kiba bun ki jaka ki la shlei um, ha kaba kane ka la pynjulor ïa kiba bun ki jingthung jingtep, pynkhyllem ïa kiba bun ki jaka bad kumjuh ka la shim ruh ïa ka jingim jong ki briew.
Uwei u briew uba la 28 snem ka rta u la hap ha kawei ka nala kaba la shlei um ha Hatma Saraitand kaba don ha ka thaiñ Lalpur ha Ranchi ha ka sngi U Blei.
Ïa ka metïap jong une u briew la ïoh ban tam bad ïa une uba la ïap la tip kyrteng kum u Dev Prasad ba la tip ruh da ka kyrteng kum u Chotu, ïa ka met jong u la lap na ka jaka kaba jngai kumba 2. 5 km na ka jaka ba la jia ka jingjia ha ka step jong ka lah sngi U Blei.
Ha Jamtara distrik kaba don ha Jhakhand, kawei ka longkmie lem bad lai ngut ki khun jong ka, kiba don hapdeng ka rta kaba shisnem shiteng, bad 7 snem, ki la ïap na ka daw jong ka jingpom pyrthat ha ka sngi U Blei, la ïathuh ki pulit.
Kane ka jingjia ka la jia ha Chandadih Lakhanpur, la ïathuh u In-charge jong ka jaka treikam jong ki pulit ha Naryananpur u Dilip Kumar ha ka jingïakren bad ki nongthoh khubor.
Shuh shuh la ïathuh ba uwei u khynnah u la ïap na ka daw jong ka jingkhyllem ka kynroh ïing ba la shna da ka ktieh ha Bokaro distrik, katba arngut kiwei pat ki khynnah kynthei kiba don ha ka rta kaba 9 bad 12 snem ki la ngam jyllop hapoh kawei ka pung kaba don ha ka shnong Mayapur ha Palamu distrik, la ïathuh shuh shuh ki pulit ha ki nongthoh khubor.
