Shillong, Risaw 02
Ka Umkseh SC ka la khur ïa ka jingjop ha ka lympung ïalehkai First Division ba la pynïaid da ka Tyrsad Area Sports Association (TASA) hadien ba ka la lah ban pynliem noh ïa ka Pyndenumbri SC da 3-2 kol ha ka lah sngi U Blei ha madan Tyrsad.
Ha kane ka jingïakhun ka Pyndenumbri ka la pynkhih jar nyngkong eh lyngba u Budlang K. Synteng ha ka minit kaba 56, hynrei hadien shi minit ka Umkseh ka la pynïakhaid kylla lyngba u Badestar Rani.
Ka Umkseh ka la pynbud biang sa ar kol lyngba u Gardinus Umdor ha ka minit kaba 66 bad u Rangkynsai Rynjah ha ka minit ba 70. Hashwa ban wai ka Budlang u la thep ïa ka kol kaba ar jong u ha ka minit kaba 88 hashwa ba ka Pyndenumbri kan mad ïa ka jingshah rem.
Ha ka jingïakhun jong ka 2nd Division, ka Mawrohroh SC ka la pynliem noh ïa ka Thaiñthynroh SC lyngba ka shi kol ba la thep da u Regelbertson Wanñiang ha ka minit kaba 48.
Haba phai sha 3rd Division pat, ka Mawsingshad SC ka la pynliem noh ïa ka Laitmawpen SC da 3-2 kol.
Kane ka lympung kan bteng bang ha ka 5 tarik ha kaba ka jingïalehkai jong ka 1st Division ka long hapdeng ka Wahlyngkien Sunei SC pyrshah ïa ka Pomsanngut SC ha ka por 12 baje, katba ka Nongspung SC ïa ka Umkaber SC ha ka por 3 baje janmiet.
