Dhalak, Risaw:
Palat 1,000 ngut ki briew ki la khlad na ka jingpang ‘Dengue’ hapoh Bangladesh naduh kaba sdang jong une u snem tat haduh une u Nailur. Kane ka jingpang khlam ka la jur bha ha katei ka ri naduh ba sdang jong une u snem 2023.
Katkum ka jingbuh jingkheiñ jong ka tnat Directorate General of Health service ha Bangladesh, la shem ba ki don haduh 1,006 ngut kiba la khlad na katei ka khlam ‘Dengue’ napdeng jong ki 2,00,000 kiba la ioh kem bad shah ktah ha katei ka jingpang hapoh katei ka ri.
Kumta ruh la ong ba ka jingkhlad ki paidbah na katei ka khlam ha une u snem, ka la jur ban ianujor bad ka jingkhlad ki briew ha kiwei pat ki snem ba kane ka jingpang khlam ka jur bad la ong ba kane ka jingpang ka la ktah jur ia ka ri Bangladesh bad kumjuh ruh ia kiwei ruh ki ri ka pyrthei ha une u snem.
U heh ka World Health Organization (WHO), u Tedros Adhanom Ghebreyesus ha une u bnai ba la lah ruh, u la ong ba ka jing lynshop jong katei ka khlam ia ka Bangladesh ha une u snem, ka la wanrah jingeh shibun ia ki tnat ka koit ka khiah namar ba kim lah shuh ban tehlakam ia ka jingpur bad jingkhlaiñ jong katei ka jingpang ha une u snem.
Ka jingpang Dengue ka long ka jingpang ba ju iapur na ka jingdait jong ki skaiñ pyrjong bad ka ju wanrah ia ki jingshitom kum ka jingshit met, ka baiongkhlieh, prie, pang ki doh ksah bad kumjuh ruh ka jingtheh snam kaba ju pynpoi syndon shaduh u pud jong ka jingiap.
Ka WHO ka la maham ruh ba katei ka khlam ‘Dengue’ bad kiwei pat ki jingpang ba ju pur na u skaiñ pyrjong kum ka Chikungunya, Yello fever bad ka Zika, ki long kiba stet haduh katta ban pur bad ban saphriang bad ka daw bah halor ka jingkhlaiñ jong katei ka jingpang ha une u snem ka long namar ka jingkylla jong ka suiñ bneng.
