C. B. Iawphniaw
Ka jingtuklar jong ki bor sorkar ïa ki kam rit kam ria ka long kaei kaei ka bym sngewïahap haei haei ruh. Kum ka nuksa ka jingpynmih hukum ka D. C. kaba ïa dei bad ka kam ïadie ïathied ïa ki syiar ha ïewduh ka long ka kam kai. Tang ïa ka rukom teh ïa ki syiar hap tuklar da ki bor sorkar. Shano keiñ ka ri bad ka jaitbynriew kan ïeng? Dei ban tuklar ïa ki kam kiba heh, ym ban tuklar ïa ka rukom thep ha ki kriah ïa ki sohsaw, ki piat namar kam ïahap namar ka dei ka kam ki nongdie keiñ. Dei ban tuklar khamtam ka rukom kit ïa u dewïong, ïa u shyiap bad ïa ka jingshna ïa ki surok bad kiwei kiwei. Ka rukom pynmih aiñ bad buh kyndon ïa ki rit ki ria ka long ka jingleh da rapjot bad arsap jong ki bor ba dei peit. Ka rukom buh Odd bad Even ïa ki Taxi kamai ruh ka long ka jingïuh roit bad khñiot beiñ ïa ki rit ki ria. Kawei de ngi ïohi ha ka por u Bah Ardent M. Basaiawmoit u dang long CEM ha District Council ruh u la pynmih hukum ban phah phong Uniform ïa ki nongbylla kitnong (Daju) ha ïewduh. Kum kane ka jingleh kam dei kaba bha. Haduh ki nongkit nongbylla ha ïewduh ki la khñium ïa ka jingleh u Bah Ardent M. Basaiawmoit bad haduh u da rem noh ha ka elekshon ha kato ka snem. Balei leit tuklar ïa ka phong Uniform ïa kiba im bylla sngi ne kitnong. Tang ki khynnah skul ki dei hok ban phong Uniform ym ïa u paidbah paidkar. Kane ka jingtuklar ia ki kam rit kam ria ka wanrah ka jingbishni bad pihuin para briew. Kane ka long tang ka jingiohi jong ngi ki riew paidbah haba ïadei bad ki aiñ pyrkhing ïa ki paidbah.
