Madrid, Risaw:
Ki bor pyniaid ka Murcia ha ka Sngi U Blei, ki la pyntip ba 13 ngut ki briew ki la duh noh ia ka jingim ha katei ka sngi hadien ka jingkem ding ha ka jaka leh kmen ‘Nightclub’ kaba don ha ka thaiñ Southeast jong ka nongbah Murcia hapoh Spain, ha kaba katto katne ngut pat kiba ngat ha katei ka jingjia, ki la mynsaw bad la pynkit noh ia ki sha ki jaka sumar kiba don ha katei hi ka nongbah.
Katei ka ding ka la sdang ban pur naduh ka por kumba 6 baje jong katei ka step Sngi U Blei bad kane ka la jia ha ka jaka leh kmen ba ju tip kum ka Teatre Nightclub bad katei ka ding ka la ïeng kynsan bad ka la bam duh ia katei ka jaka baroh kawei.
Ia mynta, ki bor pyniaid kim pat lah ban tip shai ia ka daw jong katei ka jingpluh ha katei ka step.
Katkum ka video ba la pynsaphriang paidbah da ka tnat pynlip ding na Murcia, la iohi ia ki briew jong ka kynhun pynlip ding kiba la iakhun tyngeh ban ioh pynlip ia ka ding hapoh jong katei ka club. Kumta ruh ki pulit bad ki tnat iarap ki la iakhun shitom lang baroh ban ialeh ban pyllait ia katei ka jaka na ka jingingkhong bad ki la ialeh ruh ban sei noh ia kito kiba la thiah iapler bad kiba la ing ding hapoh jong katei ka jaka khnang ban ioh pyllait im lada dang don ka lad.
Hynrei, ki heh ki la iathuh ba ka jingkhlad jong kito kiba ngat ha katei ka jingjia, ka lah ban nang kiew shuh shuh.
