New Delhi, Risaw:
Ha ka sngi ba la rakhe donburom ïa ka sngikha kaba 154 snem jong u Mahatma Gandhi, kiba bun na ki nongïalam ba pawkhmat kiba kynthup ïa u Myntri Rangbahduh u Narendra Modi ki la leit ban leh burom ïa u kpa jong ka ri ha Rajghat.
U Mahatma Gandhi u la trei borbah met bad mynsiem ban ïakhun na ka bynta ka ri India ha ka ban pynïoh ïa ka jinglaitluid bad pynlong ruh ïa kiba bun ki jingïakhih kiba la ïarap ban pyllait ïa ka ri na ka jingsynshar jong ki phareng.
Ïa u Mahatma Gandhi, la ju tip paidbah kum u Bapu. Ïa ka sngi ban rakhe ïa ka sngikha jong u la tip kum ka ‘Gandhi Jayanti’ ha kaba la ju rakhe man la u snem kaba long ha ka 2 tarik, Risaw.
Ha kane ka sngi, la rakhe donburom ïa ka sngikha jong u Mohandas Karamchand Gandhi, kaba dei ka kyrteng kaba pura jong u ne kum ka sngikha jong u Mahatma Gandhi.
Ïa u la ju kynmaw ïeid bad tip paidbah da ka kyrteng kum u “Mahatma” ne “Bapu”. Ha kane ka sngi la pynlong ïa kiba bun ki prokram bad ki briew ha kane ka sngi ki ju leit ban jngoh ïa ki jaka ba la buh sah kynmaw ïa u Mahatma Gandhi kum ha Raj Ghat kaba don ha Delhi, ka Mani Bhavan kaba don ha Mumbai bad ka Sabarmati Ashram kaba don ha Gujarat.
