Shillong, Risaw 02
U Bah Kentli Tangsang uba dei u Sordar ka Raid Lyngkhat ha ryngkat u samla Melajied Khong-buh, Assistant Publicity ka Khasi Students’ Union (KSU) Sengkmie bad uba long ruh u General Secre -tary ka KSU Nongtyngur Unit bad u Bah Hillstar Ïawbor, u Chairman ka Raid Lyngkhat ha ka 1 tarik u Risaw 2023, ki la leit ban hiar biang sa shisien ban lur pynmadan biang ïa ka madan Kynjat Lyngkhat kaba dei kawei na ki madan ïalehkai kaba pawnam bha kaba don ha syndah bad ka Bangladesh.
Kum ban shu pynkynmaw ba katei ka madan phutbol Lyngkhat ka dei kaba lah pawnam bha naduh hyndai hynthai bad khamtam hadien ba ka lah pynmih ruh ïa u samla Aibor Khongjee; u rangïalehkai phutbol uba mih bad ïakhun na ka ri India. Hynrei katei ka madan phutbol ka dei kaba lah shah pynsniewdur lut bad sah shrah lah bun snem naduh ba ka sorkar ka lah pyntrei donbor da kaba pynïaid da ka surok jong ka kper sainar shiah na shiteng ki bynta katei ka madan phutbol Lyngkhat bad hadien ba ka sorkar India ka lah pynjot, na ka liang ki bor ka Bangladesh ruh ki la wan kam trai da kaba rep ba riang haduh u pud ba kin da tih pung dohkha bad ha kaba na ka liang ki BSF ruh kim nud ban leh eiei satia.
Shuh shuh nalor ba katei ka madan phutbol ka lah shah pynjulor lut khoit, hynrei na ka liang ka sorkar ka lah pynbeit ruh ban pynhap jubor sha Bangladesh. Na ka daw ka jingshimkhia ki kynhun bapher bapher khamtam da ka seng KSU ban pyrshah jur ïa ka jingker sainar shiah jubor bad kumta katei ka kam ka lah shu sahteng noh.
Hynrei ka long kaba sngewkmen shibun ba ha ki khyndiat bnai ba la dep, na ka liang u sordar ka Raid Lyngkhat u lah leit lur hi ïa katei ka madan wat hapdeng ka thma ktien kaba jur bad ki bor pahara ka sorkar Bangladesh. Dei tat haduh ka 1 tarik u bnai Risaw kaba dei ka Sngi U Blei ba na ka liang u Sordar Bah Kentli Tangsang u lah ïathuh ba mynta u lah ïoh da ka rai ba la pyllait pat ban pyntrei suk ïa katei ka madan phutbol Lyngkhat.
U samla Melajied Khongbuh u la ong ba na ka liang ka KSU ka khlem shong kli-kti ha kaba ïadei bad ki kam khappud shapoh kitei ki thaiñ khamtam ha kaba ïadei bad katei ka madan phutbol.
U samla Melajied u la ong ba kum ka Jaitbynriew kam kwah wat tang shi inshi ka jaka jong kiwei hynrei kum ka Jaitbynriew kan ïeng ban ïada beit ïa la ka khyndew ka shyiap lade wat lada dei ban ïap ruh.
“Ka dei ka sorkar ban shim ïa ka jingkitkhlieh kumno ban ïaleh ïa kine ki jingeh namar ba wat hapdeng ba lah don u sainar shiah ruh, ki dang ïa kiew hynrei kumba ka long hi, ka sorkar ka dei ban pynkupbor ïa ki bor shnong bor thaw ba ki dei ban leh da kaba tyngeh ïa kine ki BSF bad ïa ki khar Bangladesh kiba ju pyndik ïa ki paradoh parasnam jong ngi”, la ong u samla Melajied.
Shuh shuh u samla Melajied u la ong ruh ba ka sorkar ka dei ban pynbeit bha ïa pud u sam bad ban ker bha ïa sainar shiah na ka lynti kaba dei.
Na ka liang u Bah Kentli Tangsang uba dei u Sordar ka Raid Lyngkhat, u la ong ba dang ha ki khyndiat sngi u la ïoh ïa ka hukum ban lur biang bad ba u la jop.
“Nga ïeng halor ka nongrim, ka khyndew ka hap hapoh India, balei ngin ai shapoh Bangladesh?,” la kubur u Sordar.
