Jowai, Risaw 02
Ka Chutwakhu ka la rah ïa ka nam lahduh ha ka lympung ïalehkai 2nd Division Football Tourna-ment na ka bynta ka ‘6th Debo Shullai Memorial Trophy’ ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah ban pynliem noh ïa ka Mooknor Thadmuthlong da 1-0 kol ha ka jingïakhun final kaba la long ha Kiang Nangbah Stadium kaba ha Ladthadlaboh, Jowai ha ka Lah Sngi U Blei.
Haba phai sha ka jingïakhun ka Chutwakhu ka la ïoh ban thep kol ha ka minit kaba 9 lyngba u Luckyness Khyriem bad kane ka shi kol ka neh haduh ba kut ka kylla step bad kylla miet.
Ha kane ka lympung ïalehkai la ïadon lang u para jong u (L) Debo Shullai, u Bah Sanbor Shullai uba dei u MLA ka Shillong South, kiba haïing hasem bad ki dkhot nongkitkam jong ka WJDSA ba kynthup ïa u Working President u Bah EMH. Passah, u General Secretary u Bah Lammat O Laloo, Vice President u Bah Patrick Lamare nalor kiwei kiwei.
Hadien ka jingïalehkai la sam khusnam sha ka kynhun kaba poi sha ka thong jong ka jingjop bad ka kynhun ba wan ba-ar da ka song pisa ryngkat ka trophy.
La sam ruh iaki khusnam shimet sha u Luckyness Khyriem uba la ïoh rah ïa ka nam Man of the match bad Player of the Tournament. Best Goal Keeper ka leit sha u Lalmalsawma Tariang na kynhun Chutwakhu. Ïa ka nam ‘Top Scorer’ la ioh da u Chanmitre Dkhar jong ka Lion Sports and Youth Affairs, uba la ïoh thep 6 kol ha kane ka lympung mynta ka samoi.
