Ankara, Risaw:
Katkum ka jingiohi lyngba ka camera CCTV ba la pyndait ha katei ka thaiñ, la ong ba 2 ngut ki heh pulit ki la mynsaw jur hadien ka jingbthei u bom hapoh ka nongbah Ankara hajan jong ka ïingdorbar thawaiñ ka Turkey.
Ia katei ka jingbthei la iohsngew ruh kumba katto katne kilometre na ki thaiñ ba marjan jong katei ka nongbah bad la iohi ia ki thylliej ding kiba khlaiñ kiba la ïeng na katei ka jaka ba bthei ha katei ka sngi.
Katkum ka jingiohi na kitei ki camera CCTV, la ong ba 2 ngut ki lehnoh ki la leit poi da ka kali sha katei ka jaka ha ka por kumba 9:30 mynstep hakhmat ka phalor jong ka General Directorate of Security jong ka Ministry of Interior bad kiba la leit ban pynbthei bom ia katei ka jaka ha katei ka por.
Ha kane ka jingjia, la ong ba uwei na kitei ki 2ngut ki lehnoh, u la pynbthei bom ialade ha katei ka jaka bad utei uwei pat u la ngat lang ha ka jingbthei jong utei u bom uba la bthei ha katei ka por.
Katei ka distrik ba ki lehnoh ki leit ban thombor, ka long ka thaiñ ba don ia bun tylli ki ophis sorkar bad kumjuh ruh ka ïingdorbar thawaiñ jong ka Turkey.
Ki bor pyniaid jong ka Turkey, ki la iathuh ba haduh mynta ki dang phah wad bniah halor katei ka jingjia bad la khang noh shwa ia ka jingleit jingwan sha katei ka nongbah katba ka jing-long-jingman ha katei ka thaiñ kam pat i shng-aiñ.
Ka jingjia bthei bom ba hadien duh kaba la jia ha Turkey ka long ha ka surok ba heh paid hapoh Istanbul, kaba la jia ha u Naiwieng jong u snem 2022, ha kaba 6 ngut ki la khlad hashen bad 81 ngut pat ki la mynsaw ha katei ka por.
