Washington, Risaw:
Ka United States ha ka Sngi Nyngkong ka la pynrem jur halor ka jingbthei bom hajan ka shlem treikam jong ka tnat Ministry of Interior jong ka Turkey bad kumta ruh ka US ka la maham ba dei ban tehlakam bad rat dyngkhong shi syndon ia baroh ki kam thombor jong ki lehnoh bad ka US kan don ryngkat ruh bad ka Turkey kaba long ka para dkhot jong ka kynhun NATO.
U Secretary of State jong ka United States, u Antony Blinken u la ong ba ka US ka pynrem jur ia ka jingleh ki kynhun lehnoh kiba don kti ha katei ka jingjia bad kumta ruh u la ong ba ka US ka kyntu ia baroh ki ri ka pyrthei ba ki dei ban tehlakam bad rat dyngkhong ia baroh ki kam thombor jong ki lehnoh la ka long ha kino- kino ki bynta bad ha kano- kano ka rukom.
Ha ka Sngi U Blei, 2 ngut ki dkhot jong ka kynhun lehnoh bym pat don jingithuh, ki la leit ban pynbthei bom hakhmat ka phalor jong ka Interior Ministry hajan ka ïingdorbar thawaiñ jong ka Turkey, ha kaba 2 ngut ki heh pulit ki la mynsaw jur na katei ka jingbthei ha katei ka sngi.
Ha khyndiat por ba la leit, ka North Atlantic Treaty Organisation (NATO) ka la pynpaw ia ka jingai jingkyrshan ia katei ka ri, kaba ioh mad ia kum kitei ki jingjia thombor ba khah- khah bad ka la ai mynsiem ruh ba kan iai kyrshan ia baroh ki dkhot jong ka NATO khamtam ban ialeh pyrshah ia ki kam thombor jong ki lehnoh.
Kumjuh ruh ka Embassy jong ka US hapoh Turkey, ka la pynrem jur halor katei ka jingleit thombor dusmon jong ki lehnoh ha katei ka ri bad ka la phah ruh ia ka jingai khublei bad jingkitbok ia kitei kiba ngat bad mynsaw ba kin khlaiñ noh kloi.
Ia katei ka jingbthei bom, la kam da ka kynhun Kurdistan Worker’s Party (PKK), kaba la shah khang pyrshah hapoh Turkey bad ha kiwei ruh ki ri jong ka thaiñ West.
Ha kajuh ka por, la ong ba ki bor pyniaid jong ka Turkey ki la pynkhlaiñ ia ka jing pahara ha baroh ki ophis sorkar, kynthup ia ka ïingdorbar thaw-aiñ bad ka Interior Ministry, hadien jong katei ka jingbthei bom ha katei ka sngi.
U President ka Turkey, u Recep Tayyip Erdogan haba ai jingkren hapoh ka ïingdorbar thaw-ain ha katei hi ka sngi, u la ong ba ki lehnoh kin nym lah ban pyn-urlong ia ka jingthmu jongki bad da leilei ruh kin nym lah ban leh kumta hapoh u pud- u sam jong ka Turkey.
