Shillong, Risaw 02
Ka kynhun ki ‘thei ïalehkai ka Jylla ka la khur ïa ka jingjop kaba nyngkong na ka Group-B ha ka Junior Girls’ National Football Championship (Tier 2) hadien ba ka la lah ban pynliem noh ïa ka Telangana da 4-1 kol ha Lah Sngi U Blei ha Jaipur.
Ka Dakani Shylla ha kane ka jingïakhun ka la khur ïa ka nam Player of the Match hadien ba ïoh thep ar kol.
Ha kane jingïalehkai ka Meghalaya ka la ïakhun tyngeh ha kaba ka la ïoh ban pynkhih jar ha ka minit kaba 7 lyngba ka Eiladki Ksoo. Kane ka kynhun hapoh ka jingïalam u Janbor Marbaniang ka la ïoh ban thep ïa ka kol kaba ar lyngba ka Dakani Shylla ha ka minit kaba 68.
Ha ka minit kaba 78 ka Telangana ka la lah ban pynphai kylla shi kol lyngba ka Alige Sushan-thika. Ka Dakani ka la pynbud ïa ka kol kaba ar ka jong ka ha ka minit kaba 84 bad ïa ka kol kaba khatduh la thep da ka Balabet Khongsit ha ka minit kaba 87 na ka bynta ban pynlong ïa ka Meghalaya ban khhur syndon ïa ka jingjop.
Lyngba kane ka jingjop, ka Meghalaya kan pynkhreh ïa ka jingïakhun kaba ar pyrshah ïa ka Rajasthan ha ka sngi Balang.
