New Delhi, Risaw:
Uwei u lehnoh jong ka kynhun Islamic State (ISIS) bad ar ngut kiwei pat kiba la shah suba lang ba ki dei ki lehnoh ki la shahkem ha ka kynhun Special Cell jong ki pulit ka Delhi hynnin ka sngi.
U lehnoh ISIS ïa uba la tip kyrteng kum u Mohammad Shahnawaz bad ruh kum u Shafi Ujjama, u la long uwei na ki lehnoh ïa uba la kwah ban kem da ka kynhun National Investigation Agency (NIA) bad u la shah thong ha ka khlieh jong u da T. 3 lak.
Ïa kane ka jingkem ïa kine ki lehnoh jong ka kynhun ISIS ha Delhi la ïaid shakhmat hadien ba la ïoh ïa ka jingtip kaba bniah shaphang ka jaka ba ki don.
Kane ka kynhun jong kine ki lehnoh ka la thmut ban leh ïa kiba bun ki kam thombor ha ki bynta ba shaphang Shatei jong ka ri India kynthup ha ka nongbah Delhi, hadien ka jingbthah jong ki heh nongïalam jong ki kynhun lehnoh kiba nabar ri.
U Shahnawaz, u la long u Engineer uba la lah ban ïeng hala kijong ki kjat, ïa une la kwah ban kem halor ka jingdon jong ka kynhun lehnoh ISIS ha Pune.
Une u la long u nongshong shnong jong ka Delhi bad u la lait phet na kti jong ki pulit ka Pune. U la pynlong jaka rieh ha Delhi ha shwa ba un shahkem.
Baroh lai ngut kine ki lehnoh kynthup u Shahnawaz, ki la shah tohkit bniah.
Ki heh jong ka kynhun pulit ki la ïoh ban kurup ïa kiba bun ki tiar kiba long beaiñ, kynthup ki dawai um kiba ju pyndonkam ha ka ban shna ïa ki bom bakhlaiñ bor ki Improvised Explosive Devices (IEDs).
Dang shen, ka kynhun NIA ka la dep ban pynbna ïa ka khusnam kaba T. 3 lak halor uwei uwei u lehnoh lada lah ban ai jingtip ei ei shaphang jong ki, kata kynthup ïa u Shahnawaz bad shaphang ki lai ngut kiwei pat kiba la shah suba ba ki dei ki lehnoh.
Ha kaba ïadei bad ka jingjia jong ka jingdon ka kynhun ISIS ha Pune, ki la don kumba san ngut ki briew kynthup u doktor kiba la shahkem haduh mynta.
