Shillong, Risaw 02
Ka Treilang Welfare Society ryngkat bad ka jingïasnoh kti lang bad ka Meghalaya Arm Wrestling Association, kan pynlong ïa ka 1st Shillong Para Arm Fight Championship, 2023 bad ka Shillong Arm Fight Open Challenger Championship 2023 ha ka 14 tarik u Risaw mynta u snem ha madan Malki, Shillong.
Ka jingthmu jong kane ka jingïakop ka long ban jied ïa ki nongïalehkai kiba kynsai ki ban ïashim bynta ha ka Shillong Arm Fight – All India Championship 2023 ka ban sa pynlong ha u Nohprah mynta u snem.
Ha kaba ïadei bad kane ka rynsan ïakhun kti, yn don shwa ka jingthew jingkhia ïa baroh ki nongïashim bynta ha ka 13 tarik ha madan Malki naduh ka por 11 baje mynstep haduh ka 4 baje janmiet. Te kumta ha kaba ïadei bad kane ka bynta, ki nongïalehkai kiba don jingthmu ban ïashim bynta ki lah ban phone ha ki number 9774534908, 7005861828, 8414073899, 9774647280 ia ki jingtip kiba kham bniah.
