Geneva, Risaw:
Ka World Health Organization (WHO) ha ka Sngi Nyngkong ka la iathuh ba ki heh jong katei ka tnat ki la ai jingmynjur bad pynshlur ia ka jingpynmih paidbah bad ka jingpyndonkam ia u tika ‘R21/Matrix-M’, uba long u tika ba ar na ka bynta ban pynkhiah ia ka jingpang khie shoh rih ne ‘Malaria’, bad uba la shna bad pynmih da ka Oxford University jong ka Britain.
Ia kane ka tika ‘R21/Matix-M’ la pynmih ruh da ka Serum Institute of India bad la pyndonkam ia ka hapoh Burkina Faso, Ghana bad ha Nigeria.
Ha u snem 2021, ia ka dawai tika RTS, S, la pynmih da ka kompeni shna dawai ba paw bha na Britain ka GSK bad ka la long ka dawai tika ba nyngkong eh ban ioh jingmynjur na ka WHO naka bynta ban iada na ka jingpang khie shoh rih ha ki khynnah khamtam ha kito ki jaka kiba katei ka jingpang ka jur bad stet bha ban pur.
kumjuh, ha kane ka por ruh, ka heh jong ka WHO na Africa, ka Dr. Matshidiso Moeti, ka la ong ba kane ka dawai tika kaba thymmai ka long ka kabu ksiar ban tehlakam ia ka jingpur bad jingjur jong katei ka jingpang ha kine ki sngi ban wan.
Kumta ruh la ong ba ka jingpynmih bad jingpyniaid ia kane ka dawai sha kylleng ka pyrthei, kan iarap ban tehlakam ia ka jingpur jong katei ka jingpang khlam bad kan iarap ruh ban pynduna ia ka jingkhlad ki khyllung- khynnah ha ki por ki ban wan.
