Shillong, Risaw 03
Ka nongkawang sum jong ka ri ka Annu Rani ka la lah ban pynpaw ïa ka jingtbit na ka bynta ban pynlong ïa ka India ban khur ïa 15 tylli ki takma ksiar ha ka Asian Games kaba dang ïaid mynta ka sngi Ba-ar ha Hangzhou bad haba kheiñ kyllum ka India ka la khur haduh 59 tylli ki takma.
Ha kane ka jingïakop ka Annu ka la lah ban kawang 62.92m, ha kaba ka la lah ban ïalehkai bha mynta ka aïom bad ban jam sha katei ka kyrdan ba hakhlieh hadien ba ka la lah ban kawang ha ka jingpyrshang kaba saw.
Ka nongkawang sum kaba na Sri Lanka ka Nadeesha Dilhan ka la khur ïa ka takma rupa hadien ba la lah ban kawang ha ki 61.57m, katba ka nongïalehkai na China ka Huihui Lyu ka la khur ïa ka takma rnong ha kaba ka la lah ban kawang ha ki 61.29m.
Kham hashwa ha kane ka sngi, u rangïalehkai jong ka ri u Mohammed Afsal Pulikkalath u la khur ïa ka takma rupa ha ka men’s 800m final.
Ha ka jingshisha u Afsal u la dei ban khur ïa ka takma ksiar, rynrei u la shah tam tang khyndiat bad u la duh ban wan ha ka kyrdan ba hakhlieh. Te kumta ïa ka takma ksiar la khur da u rangïalehkai na Saudi Arabia u Essa Ali Kzwani.
Ha kane ka jingïakop u Afsal u la lah ban pyndep ha ki 1:48.43 sekhon ban khur ïa ka takma rupa hadien ba utei u nongmareh na Saudi Arabia u la tam da 0.39 sekhon na ka bynta ban pyndep ha ki 1:48.05 sekhon.
Ïa ka takma rnong la khur da u rangïalehkai na Oman u Husain Mohsin Husain, uba la lah ban pyndep ha ki 1:48.51 sekhon.
Ha ka liang ki kynthei, ka nongmareh jong ka ri ka Parul Chaudhary ka la khur ïa ka takma ksiar ha ka jingïakop mareh kaba 5000m.
Hadien ba ka la khur ïa ka takma rupa ha ka 3000-metre steeplechase ha ka lah sngi U Blei, ka Parul ka la lah ban pyndep ha ki 15:14.75 na ka bynta ba khur ïa ka takma ksiar bad ban long kaba nyngkong napoh ri India ban khur ïa ka takma ksiar ha ka jingïakop mareh kaba 5000m ha ka Asian Games.
U Praveen Chitravel u la khur ïa ka takma rnong ia ka ri India ha ka Men’s Triple Jump. Une u rangïalehkai u la sdang da kaba pyndep ha ki 16.68m. Ha ka jingpyrshang kaba ar u la lah ban ïai bteng ban kynjoh sha ki 16.63m. U Zhu Yaming u la lah ban tam ïa utei u rangïalehkai jong ka ri ha ka jing-jngai kaba 16.97m.
