Texas, Risaw:
Katkum ki khubor, la ong ba uwei u khyllung 3 snem u la duh noh ia ka jingim hadien ba ngam jyllop ha ka um hapoh ka ‘Waterpark’ kaba don ha ka nongbah Texas, katba ka kmie jong u ka dang lap-miet ha ka phone da ki kynta, ha ryngkat ka rwai ka siaw bad ki jing-rwai ba ka sngap.
Katba, na ka liang ka nongïasaid aiñ jong katei ka briew, ka la kynnoh kylla ia ki nong-ap ha katei ka jaka ba kim lah ban peit bad kim lah ban iarap ban pyllait im ia utei u khyllung ha katei ka jingjia.
Kane ka la jia hapoh ka Camp Cohen Water Park kaba don ha El Paso, ha kaba ka Jessica Weaver, 35 snem ka rta, ka la shah pynngat kyndon halor ka jingbym phikir jongka ia la u jong u khun ba marwei.
Katto katne ngut pat ki nong sakhi kiba ïadon lang ha katei ka sngi, ki la kynnoh ba dei ka jingleh sting bad jing bym don por jong ka Jessica ba kam shym peit ia la u jong u khun uba dang rit bad uba dang dei ban peit bha khamtam haba ialam sha ki jaka ki bym shngaiñ bad kiba ap jingma. Kane ka jingjia ka la jia ha u bnai Jymmang.
Ha ka 30 tarik u Nailar pat, ka Jessica ka la shah kem noh napoh ka jaka sah jongka ha Indiana, ha kaba ka la pdiang ia la ka jingbakla. Hadien kata, la rah ia ka naka bynta ki jingtohkit bad ban tian bishar hadien ba la rah ia ka sha El Paso County Jail ha ka 22 tarik u Nailur bad ka la shah pyllait jamin noh ha ka bai bah jamin ba $1,00,000 haba iadei bad katei ka jingleh pynkheiñ aiñ jongka.
Ha katei ka por ba katei ka jingjia ka la jia, la don tang uwei u nong-ap napdeng ki 18 ngut kiba dei khmih ha katei ka jaka bad dei ma u ruh uba leit sei ia utei u khyllung na katei ka jaka jngi ‘Pool’ kaba jrong kumba 4 phut.
La iathuh ruh ba utei u khyllung um shym la don kano- kano ka kynja tiar ban iarap lane ka ‘Life Vest’, watla katei ka jaka ka la buh khnang ia kitei ki jaket ban pynphong ia ki bym nang ban jngi hynrei katei ka kmie kam shym la pynphong ia utei u khyllung. Kane hi ka pyni ba baroh ka dei ka jingbakla jong katei ka longkmie ka bym nang ban phikir ia la u jong u khun bad kaba lap-miet pynban tang ha ka mobile phone bad kaba la pynlong ia ka ban duh noh syndon wat ia u khun ba marwei jongka.
Katkum ki kyndon ba la buh da ka ‘Camp Cohen’, la ong ba ia ki khyllung bad khynnah ba hapoh ka 6 snem ka rta, dei ban don beit kiba peit ne kiba ap khnang ban lait na kino- kino ki jingma, khamtam ba katei ka jaka jngi ka long kaba la jrong bad kaba la tam bun ia ka rynïeng jongki.
Kumta, ki don katto katne ngut kiba la sakhi bad iathuh ba katei ka longkmie kam shym la peit wat tang khyndiat ruh ia utei u khyllung uba long u khun jongka. Hynrei ka la shu lap-miet ha ka sngap jingrwai bad shon dur ialade khlem da pynleit jingmut ia ka jingma bad jing bym shngaiñ jong katei ka jaka.
