Shillong, Risaw 03
Ka Meghalaya Cycling Association (MCA) kan pynlong ïa ka jingpyrshang (selection trial) na ka bynta ban jied ïa ki nongñiah saikil trial ha ka 24 tarik mynta u bnai Mawkyrwat, South West Khasi Hills.
Ka jingthmu jong kane ka program ka long ban sei ïa ki nongñiah saikil kiba kynsai ki ban mihkhmat ïa ka Jylla sha ka 20th National MTB Championship ban pynlong da ka Cycling Federation of India ha u snem 2024 ha Haryana.
Ha kane ka jingpyrshang la phiah ha la ki jong ki kyrdan ïakop kata ka Downhill na ka bynta baroh ki nongïashim bynta kynthe bad shynrang, katba ïa ka XCO la phiah ha la ki jong ki kyrdan na ka bynta ki youth kaba naduh 15 haduh 16 snem, ka Junior naduh 17 haduh 18 snem ka rta bad ka Elite kaba dei na ka bynta kiba 19 snem shaneng.
Haba ïakren bad ki nongthoh khubor u President ka Meghalaya Cycling Association u Bah Lening Bareh u la ïathuh ba na ka liang ka synjuk kan shim ïa ka bairung kaba T.300 tyngka ïa ki nongïashim bynta. “Kane ka bai rung ka dei kaba rit eh namar ngi hap ban pynbiang ia ka jaka sah, ka bam ka dih na ka bynta baroh ki nongwan ïashim bynta na kylleng ka Jylla.” La ong u Bah Bareh.
“Kiba shah jied na kane ka prokram kin ïoh ïa ka jingshah hikai hashwa ba kin mihkhmat ïa ka Jylla sha katei ka jingïakop ka ban long ha Haryana, kumjuh ka National Bames bad kiwei kiwei ki jingïakop.”
Shuh shuh u Bah Bareh u la ïathuh ba ka cycling cross country ka dei kawei na ki sports ba hi ki nongshong shnong jong ka Jylla ki ïahap bha ruh, namar kam donkam than ka jingjrong ne ka jingheh briew kum kiwei ki jait jingïalehkai. “Hynrei nalor ba ngi don ki lum ba janai ban kilanmet bad ha kajuh ka por ka don ka kabu ksiar ia ngi ym tang ha ka national level bad wat ban ïoh takma ha ki jingïakop shabar ri kum ki Asian Games bad wat ha ka Olympic ruh.”
