Hadien ba ka High Court jong ka Meghalaya ka la khang khyrdep noh ïa ki pyrda jong ka drama “tip-briew tip-blei” ba la neh palat khathynñiew snem bad ba la ak bad shim bynta da arngut ki nongpynïap-briew ba shalak, kata u Bernard Lyngdoh Phawa bad u Bonie Lyngdoh Phawa na Pynthor Umkhrah, da kaba ai khusnam ruh ïa ki da ka jingset along kaba shirta jingim, ki bahaïing-hasem bad ki paralok-parajor jong u samla Biplab Das, 21 snem ka rta uba pule ha ka Mass Communication Department jong ka St. Anthony’s college, ki la ïaroh shikatdei ïa kane ka rai bad kheiñ ruh kum ka jingjop kaba radbah jong ka hok.
Haba risa ïa kane ka rai jong ka High Court, ki nongsngewlem jong u samla Biplab Das ki la pynsngew ruh ba kane ka rai na ka High Court kadei ruh ka jingmaham sha baroh kito ki runar kiba ju donkti ban leh ïa ki kam pyntriem, khamtam ki kam pynïap briew, da kaba ong ba ym don mano mano ruh ba lah ban lait phet na ki kti jong ka aiñ, wat la ki briew kiba don ha ka bor ki don ban ïada ïa ki ne tap-eit-miaw ïa ki kam bymmnan jong ki. Wat la ka rai ba shonghok kan ym pynïoh biang ïa ki baieid bathoiñ sha ki bahaïing-hasem jong ki, ne pyndam-pynklet noh ïa kaei kaba la jia, hynrei ka rai ba shonghok kum kane ka long kaba donkam shisha khnang ban pynrem ïa ka sur lamler jong ki nong-leh kam bymman, ne ïa kito kiba pynksan ïa ki nongleh kam bymman.
Shuh shuh, ka Ïing Bishar ka don ïa ka bor bad ka kamram ban pynïoh ïa ka hok sha kito ki lanot kiba ngat ha kum kine ki apot sepsngi; bad ka don ruh ïa ka jing-kitkhlieh ban pynpaw pyrthei ïa ka jingkordor jong ka jingim briew. Ngi kyntu ïa ki Nongbishar ban pyndonkam hok ïa kata ka bor bad ban ym ailad ba kum kine ki mukotduma kin poi sha ka jingsahteng. Ha ryngkat ka jingïap jong iwei pa iwei i mynsiem ba kordor, don ruh ar tylli ki jingshisha: kawei kadei ka jingïap hi, bad kawei pat kadei ka jingbympoi shano shano ruh ka mukotduma. Ka por ka la dei ban pynkut noh ïa kane ka rukom.
Kiba burom ïa phi,
Dr. Pooja Sharma, Dr. Roshni Das Gupta and Prof. Jason Lyngdoh, Ki samla pule barim ka St. Anthony’s College
