Manaus, Risaw:
Katkum ka jingshem haba iadei bad ka jing-iap ki dohkha ‘Dolphin’ da ki spah tylli ha ka wah Amazon naduh ka taïew ba la leit, la shem ba ka dei namar ka jingkhluit ka suiñ bneng bad ka jingtyrkhong kaba la pynlong ia katei ka wah ba duna um.
Namar ka jingduna um jong ki wah bad ka jingkhluit jong ka suiñbneng ka la pynlong ia ka um ba kan khluit bad kumta ka long kaba eh ia ki jingthaw ba im ha um bad kin im bad kin ialeh pyrshah ia ka jingkhluit. Da ki hajar tylli ruh ki dohkha kiba don ha ki wah bapher jong ka Amazon ki la shu iap pathar namar ka jingkhluit jong ka um bad kim ioh shuh ia ka lyer khuid ‘Oxygen’ ba kin ring mynsiem.
Ia kitei ki jait dohkha dolphin kiba don hapoh ka wah Amazon pat, la ong ba ki long kiba kham pher bad lah ban shem tang ha ki wah jong ka South America bad ki long ruh ki jait dohkha kiba im tang ha ka um kaba khuid bad kaba don ia ka lyer khuid kaba biang.
Kumta, ki tnat ba dei khmih ki la shim ia ki nongmuna na kitei ki dohkha kiba iap, khnang ban ioh pule bniah bad ban wad bniah halor ka daw ka jingiap jongki.
Namar la ong ruh ba wat da ki stad saïan kim shym kynnoh beit tang ia ka jingkhluit ka suiñbneng ba kitei ki dohkha kin shu iap pathar. Hynrei ki la suba ruh ba lah ban don da kiwei pat ki daw kiba wanrah ia katei ka jingiap khlam ki dohkha ha katei ka wah.
Katba, na ka liang ki heh jong ka tnat mariang, ki la kynnoh ba dei namar ka jingkylla jong ka suiñbneng bad khamtam ka jingkhluit jong ka suiñbneng ha kine ki sngi mynta kaba la pynlong ia ka pyrthei- ka mariang ba kan khluit bad tyrkhong.
Haba iadei bad kane, ka tnat Institute for Biodiversity Conservatoin (ICMBio) jong ka Chico Mendes na Brazil, ka la leit sha katei ka wah ban leit tan ia kitei ki dohkha kiba dang lah ban pynim. Hynrei kim pat lah pat ban pyllait ia ki sha ki jaka bad sha ki um kiba kham khuid bad kham pyngngad tad haduh ba yn da dep ban wad bniah ia ka daw ka jingiap jongki bad lada ka jingiap jongki kam long namar kino- kino ki jingpang.
