Mumbai, Risaw:
Ka jingïap jong ki briew ha ka hospital sorkar kaba don ha Nanded distrik ha Maharashtra ka la kiew sha ka 31 ngut hadien ba ki la don sa 7 ngut kiba dang ïap shen.
Ki nongpang kiba la ïap ha hospital ki kynthup ïa 15 ngut ki khyllung bad ki khynnah bad 16 ngut kiba la heh la san.
Ha ka jingpyllait khubor ha kawei na ki lad phah khubor, ka Nanded District Information Office (DIO) ka la ong, “Ka jingshisha ha kaba ïadei bad ka jingïap jong ki nongpang ha Dr Shankarrao Chavan Government Medical College and Hospital ka long kumne: ki la don 24 ngut kiba la ïap hapdeng ka 30 tarik, Nailur bad 1 tarik, Risaw, 7 ngut kiba la ïap hapdeng ka 1 tarik, Risaw bad ka 2 tarik, Risaw.” “Sngewbha wat ym sheptieng. Ka kynhun jong ki doktor ka la long kaba la khreh,” la bynrap ka jingthoh.
Ka jingbuh ryntih ha kaba ïadei bad ka jingdon jong ki briew kiba la ïap ha kane ka jaka ai jingsumar la phah ruh da u Myntri Rangbah barim jong ka Maharashtra u Ashok Chavan.
Ki heh ba dei khmih jong ka Shankarrao Chavan Government Hospital ha ka Lah Sngi U Blei ki la ong ba ka jingïap jong kine ki nongpang ka la long na ka daw jong ka jingduna ki dawai.
U heh nongkhmih jong ka hospital u la ong ba ki la don kumba 12 ngut ki khyllung bad khynnah kiba la ïap kynthup 6 ngut ki kynthei bad 6 ngut ki shynrang.
U la bynrap shuh shuh da kaba ong ba ki la don kumba 12 ngut kiba la heh la san kiba la ïap ha kane ka jaka ai jingsumar ki dei kiba la shah ktah na kiba bun ki jingpang kynthup ïa kiba la shah puh bseiñ.
U la ong ba kane ka hospital kam pat biang ki rukom sumar, hynrei ki nongpang ki la wan na kylleng ki jaka namar ba ka dei tang kane hi ka jaka ba ju ai jingsumar ha ka thaiñ jong ki kaba don ha ka jingjngai kaba 70-80 km na ki shnong jong ki.
Ka jingdon jong ki nongpang ka la kiew bha ha kane ka jaka ai jinsumar, bad kane ka dei kawei na ki daw ba duna ki dawai, u la bynrap.
Ha kaba ïadei bad kane, ka hospital ka la phah da ka jingthoh ha ka sngi Ba-ar ha kaba ka la ong ba kam shym la duna dawai ha ka jaka ai jingsumar, hynrei ki nongpang kiba la ïap ki dei kiba la wan phah sumar ha ka por ba ki la don hatmier ne ha ka bynta kaba khatduh ba kin ïoh jingsumar.
Ka Cabinet ha Maharashtra ka la ïakren sani bha ha kaba ïadei bad ka jingïap jong ki briew ha Nanded Hospital.
Haduh ba la thoh ïa ka khubor ym pat lap ïa ka daw tynrai halor ka jing-ïap jong ki nongpang ha kane ka jaka ai jingsumar, ha kaba ki bor ba dei khmih ki la pyntreikam shakhmat ban wad ïa ki jingshisha baroh.
