Srinagar, Risaw
Uwei u Head Constable jong ka tnat Central Reserve Police Force ha ka Sngi U Blei u la ïap na ka daw ka jingmynsaw na ka jingdei kuli ha kaba u la mynsaw jur hapoh Kot Bhalwal Jail kaba don ha ka thaiñ Gharota ha ki bynta ba marjan bad ka nongbah Srinagar. Kumba la ïathuh da ki pulit, la ong ba u pulit langrut ïa uba la tip kyrteng kum u Rakesh Kumar, uba dei u nongshong shnong jong ka Mukundgarh, jong ka distrik Jhunjhunu, kaba don ha Rajasthan, ïa uba dang shen u la sdang ïa ka kam jong u hadien ka shuti, u la ïap ha kaba la lap ba u la don ka jingmynsaw na ka jingdei kuli ha phyllaw jong katei ka patok.
“Haba la ïohsngew ïa ka jingsawa kuli ha ka step jong kane ka sngi, ki pulit pahara ki la mih na ki jaka ba ki don bad leit khmih sha ka jaka ba wan ka jingsawa. Haba ki la poi ha katei ka jaka ki la shem ba une u pulit langrut u la thiah hapdeng ka jinglyngkien jong ka snam hakhmat ka jaka ban rung sha patok bad ka suloi Ak-47 kaba u bat ban pyndonkam ka la don hajan jong u,” la ïathuh ki pulit.
Na ka jingtohkit kaba hashwa, la suba ba une u pulit u la pyndkut hi ïala kajong ka jingim hynrei ka jingpyntreikam ka dang ïaid shakhmat ban tip ïa ka daw halor ka jingïap jong u bad ki jingshisha baroh kin sa paw hadien ka jingtohkit kaba bniah.
