New Delhi, Risaw:
Ki la don ar ngut ki shipai na ka tnat Army kiba la mynsaw ha ka jingïasiat kaba markylliang bad ki lehnoh ha Rajouri distrik kaba don ha Jammu & Kashmir, la ïathuh ki heh pulit ha ka Sngi Ba-ar.
Ka jingïasiat ka la long hapdeng ki shipai ïada ri bad ki lehnoh ha ka janmiet jong ka Lah Sngi U Blei hadien ka jingleit kerkut bad ka jingleit thwet lehnoh ha ki bynta jong ka khlaw kaba don ha ka distrik, ki la ong.
Ka kynhun ba la ïatreilang hapdeng ki shipai ka tnat Army bad ki pulit jong ka Jammu & Kashmir ki la leit ban kerkut ïa ka Broh bad ka Soom ki jaka ba don harud jong ka khlaw ha ka thaiñ Kalakote ha ka Lah Sngi U Blei hadien ba la ïoh jingtip shaphang ka jingdon jong ki lehnoh, ki la ong.
Ki lehnoh ki la siat ïa ka kynhun jong ki shipai bad pyrshang ban khanglad ïa ki shipai ba kin khang kdong ïa ki ha kaba nangne ka la mih ka jingïasiat kaba jur hapdeng kine ki ar kynhun, la ïathuh shuh shuh ki heh shipai.
Ki heh shipai ki la ïathuh ba kine ar ngut ki shipai kiba la shah siat ki la mynsaw bad shah sumar ha ka jaka ai jingsumar, ha kaba mynta kine ki la kham ïoh bor.
La ngeit ba ar ngut ki lehnoh ki la don hapoh ka jingshah khang kdong jong ka kynhun ki shipai bad ki pulit, la ong ki heh pulit, ha kaba ki la bynrap shuh shuh da kaba ong ba mynta la nang pynkhlaiñ shuh shuh ïa ka kynhun jong ki shipai ban kerkut ïa ki lehnoh bad ha ki jaka ba lait lynti ïohba ki lait phet.
U nongaiktien jong ka tnat ïada ri u la ong ba ka kynhun ba la ïatreilang ka la pynlong ïa ka jingpyntreikam ha ki thaiñ Kalakote bad la pyntreikam ruh ïa ki kor ki bor khnang ban khanglad bad ban ïakhun pyrshah ïa ki lehnoh.
Kumba ka long mynta, la ong ba ka jingpyntreikam jong ki pulit ban ïakhun pyrshah ïa ki lehnoh kiba la shah ketkut ha katei ka thaiñ ka dang ïai bteng, u la ong.
