Khliehriat, Risaw 03
Ki pulit jong ka East Jaiñtia Hills District kiba la pynlong ïa ka jingtalasi ïa ki kali hajan ka thanat Lumshnong kata ha ka surok NH-06 ha ka Sngi Ba-ar, ki la sakhi ïa ar tylli ki trok kiba wan mar pyrshah, kata kawei kaba wan na ka thaiñ Khliehriat bad kawei na ka thaiñ Umkiang kiba la pyndait ne don ïa ujuh u registration number (number plate) kata JK02-AU-5651.
U Officer in-charge ka Lumshnong Inspector Mathius Sangma u la ïoh jingtip ïa kane na ki pulit kiba pynlong ka jingtalasi kali, kiba la pyntip ïa u ba ha ka por kumba 2.20 eiei nohphai sngi, ki la pynsangeh ïa kitei ar tylli ki trok na ka bynta ban pynlong ka jingjurip ïa ki kot ki sla.
La ong ba kawei na kine ki trok kaba wan na ka thaiñ Umkiang ka la sangeh, katba kawei pat ka trok kaba wan na ka thaiñ Khliehriat ka la kyntait ban sangeh bad pynher shakhmat.
Hadien kata na ka liang ki pulit ki la pynlong ka jingbeh thong ïa kane ka trok bad tang hadien khyndiat por u nongñiah jong kane ka trok u la phet krad noh ïalade da kaba ieh noh ïa ka trok ha surok bah.
Hadien kane la wanlam noh ïa kane ka trok shapoh ka thanat Lumshnong namar ka jingsuba kit ïa ki tiar kiba beaiñ. Haba pynlong ka jingtalasi ha ryngkat ka jingïadon lang ki sakhi ba laitluid bad u Additional SP u Bah Jason Mairom MPS, la lap ïa 150 tylli ki pla kiba don haduh 44900 tylli ki bilor dawai jyrhoh Phensedyl kiba la kheiñ be-aiñ kiba 100ml.
Kumta haba ïa dei bad kane ka jingjia la pynrung case hapoh thanat Lumshnong bad ka jingthwet ban ïoh kem ïa ki briew kiba donkti ka la ïaid shakhmat.
