Bhopal, Risaw:
Ka seng Aam Aadmi Party (AAP), kaba long ka dkhot jong ka kynhun synrop jong ka liang pyrshah ka INDIA, ka la pynbna ïa ka thup kyrteng ba ar jong 29 ngut ki kyrtong na ka bynta ka jingïakhun ïa ka ilekshon Assembly ka ban sa wan ha Madhya Pradesh.
Haduh mynta, ka seng AAP ka la pyllait ïa ki kyrteng jong ki kyrtong ki ban ïakhun na ka bynta ki 39 tylli ki konstitwensi ha ka jylla, ha ryngkat ka thup kyrteng kaba la pyllait hashwa jong ki 10 ngut ki kyrtong ïa kaba la dep ban pyllait ha u snem ba la lah.
Kumba la ïathuh, la ong ba ha kane ka thup kyrteng ba ar, la kynthup lang ruh ïa ka kyrteng jong ka Mamta Meena, kaba long ka MLA barim jong ka seng BJP kaba la leit ban pynïasoh bad ka seng AAP hadien ba la kyntiat ban ai tiket da ka seng BJP na Chachoura konstitwensi.
Ka seng AAP ka la pynïakhun ïa ka na kajuh ka thaiñ. Ha kane ka thup, ïa ki kyrteng jong ki kyrtong kiba dei ban ïakhun na ki konstitwensi ba la mang lypa ki kynthup ïa ki lai ngut na ka kynhun Scheduled Tribe (ST) bad saw ngut jong ka Scheduled Caste (SC) ruh la dep ban pynbna. Shuh shuh la ïathuh, arngut ki kyrtong ki dei na ka nongbah Bhopal, u Mohammed Saud (Bhopal North) bad ka Raisa Begum Malik (Narela), ki la shah pynbna kum ki kyrtong ban ïakhun ha ka ilekshon.
Na Indore distrik, lai ngut ki kyrtong ki la shah pynban kyrteng, kine ki kynthup ïa u Sunil Choudhary (Mhow), Anurag Yadav (Indore-1), bad u Piyush Joshi (Indore-4).
Kane ka thup ka kynthup ruh ïa ki kyrteng jong ki kyrtong kum ka Ramani Devi Jatav (Bhander), Rahul Kushwaha (Bhind), Satinder Bhadoriya (Mehgaon), Chahat Mani Pandey (Damoh), Chanda Kinnar (Malhara), Sunil Choudhary (Mhow), Bheru Singh Anare (Gandhwani), Anoop Goyal (Shivpuri), Sunil Gour (Seoni-Malwa), Anand Singh (Bargi), Pankaj Pathak (Panagar), bad Vijay Mohan Palha (Patan), napdeng kiwei pat.
Kumba ka long mynta, ba ka don ha ka bor synshar ha Delhi bad Punjab, ka seng AAP ka la pynïakhun ïa ki kyrtong kiba kynthup ïa u Nan Singh Nawde (Sendhwa), Dilip Singh Guddu (Deotalab), Varun Ambedkar (Mangawan), Umesh Tripathi (Mauganj), Varun Gujjar Khatik (Raigaon), Usha Kol (Manpur), Ratibhan Saket (Devsar), Anand Mangal Singh (Sidhi), Amit Bhatnagar (Bijawar), Bhagirath Patel (Chhatarpur), Subodh Swami (Nagda-Khachrod), bad u Deepak Singh Patel (Rewa).
Katba ka seng kaba bat ïa ka jingsynshar ka BJP ha MP ka la dep ban pynbna lypa ïa ki kyrteng jong ki 79 ngut ki kyrtong ha ki lai tylli ki thup kyrteng bapher bapher jong ki kyrtong, ka seng Congress haduh mynta kam pat pynbna ïa ki kyrteng jong ki kyrtong ki ban ïakhun ilekshon.
