Shillong, Risaw 03
Ka Umlyngka SC ka la khur ïa ka jingjop kaba nyng-kong ha ka lympung ïalehkai SRGT 3rd Division Football League 2023 ba la pynïaid da ka Shillong Sports Association.
Kane ka la wan hadien ba ka la lah ban pynliem noh ïa ka Lapalang SC da 2-0 kol ha ka Sngi Ba-ar ha madan Third Ground, Polo.
Ha kane ka jingïakhun baroh ar ki kynhun ki la pyrshang ban ïalehkai bha, hynrei ka Umlyngka ka la pyni ïa ka jingtbit ha kaba ka la ïoh ban pynkhih jar nyngkong eh lyngba u Jolly Hynñiewta ha ka mint kaba 56. Kane ka kynhun ka la pynbud biang ïa ka kol kaba ar lyngba u Chesterfeild Makroh ha ka minit kaba 60 na ka bynta ban khur syndon ïa ka jingjop.
Ïa kane ka lympung la sdang ha ka lah sngi U Blei ha kaba ka Krang SC bad ka Nongmynsong SC ki la ïasam mar shi point hadien ba ki la ïakhaid mar 2-2 kol.
Ka Nongmynsong ka la thep kol nyngkong lyngba u Tisharbor Rani ha ka minit kaba 20 bad ïa kawei pat la pynbud da u Midal Amsong ha ka minit ba 45. Hynrei ka Krang ka la lah ban pynïakhaid kylla lyngba u Kyrpanglang Mawlong ha ka minit ba 49 bad u Kynjohbor Thangmaw (59).
Ka jingïalehkai ha ka sngi Balang kan long hapdeng ka Nongkseh SC pyrshah ïa ka Mawshbuit SC ha ka por 4:45 janmiet.
Ki kynhun kiba ïashim bynta ha kane ka lympung ki don baroh 21 tylli ha kaba la phiah ïa ki ha la ki jong ki group. Ki kynhun kiba don ha ka Group-A ki long ka Umlyngka SC, Lapalang SC, Krang SC, Nongmyn-song SC, Gorkha Association bad ka Meghalaya Police F.T. Ha ka Group-B ki long ka Nongkseh SC, Mawshbuit SC, Pay For Right Football Acadedmy, Pollakrai bad ka Mawryngkneng SC. Ha ka Group-C ki kynthup ïa ka Sanmer SC, Umpling SC, Mawpat SC, Mylliem Lum SC bad ka Lumparing SC. Katba ha ka Group-D ki long ka Nongumlong SC, Lawmali Pyllun SC, Rynjah SC, Tynring SC bad ka Lumdiengjri SC.
