Nongpoh, Risaw 03
Da ka mynsiem jong ka jingkmen bad ka jing-sngewsarong, ki kynhun seng bapher bapher ka Ri Bhoi District ha ka Sngi Ba-ar ki la mih ban pdiang burom ïa u rangapkol ba kynsai jong ka ri India, u samla Lionel Daryl Rymmei, uba la khur ïa ka nam Best Goalkeeper ha ka lympung ïalehkai SAFF U-19 kaba la long ha ri Nepal.
Ha katei ka jingïakhun final jong kane ka lympung kaba la long ha ka Sngi Saitjaiñ jong ka taïew ba la dep, ka India ka la khur ïa ka nam lahduh hadien ba ka la lah ban pynliem ïa ka Pakistan da 3-0 kol ha Dashrath Stadium, Kathmandu, Nepal bad utei u rangapkol uba na Umroi, Ri Bhoi District u la khur ïa ka nam rangapkol ba kynsai.
Ha ka jingwanphai ïing jong utei u samla Lionel Daryl ba la synran lang da kiba haïing hasem, ki kynhun kiba la pdiang burom ïa u ki kynthup naduh ka Ri Bhoi District Sports Association (RB-DSA) bad ka Confedera-tion of Ri Bhoi People (CORP) kiba pdiang burom ha Umsning, ka Young Minds Association (YMA) ha Umran lem bad ka Federation of Khasi Jaiñtia & Garo People (FKJGP) ha Jorabat.
Ïa u samla Lionel la pdiang burom da kitei ki kynhun bapher bapher da ki jingai sngewbha lem bad ki kyntien ai jingïaroh halor ka jinglah ka jong u ban wanrah ïa ka nam ka burom kaba long ka jingsngewsarong ym tang ïa ka ïing ka sem, ka shnong ka thaw, hynrei ka burom ïa ka district, ka jylla bad ka ri hi baroh kawei, naba katei ka lympung Under-19 kaba la pynïaid da ka SAFF ka dei kaba la wan ïashim bynta da kiwei de ki ri jong ka thaiñ South Asia ba kynthup naduh ka Bangladesh, Bhutan, Maldives, Nepal bad Pakistan.
Na ka liang u kpa utei u samla, u Bah M.D Syiem uba la synran lang naduh ka ri Nepal lem bad kiwei de kiba haïing hasem bad ki paralok, haba kren ha Umsning, u la pynpaw ïa ka jingsngewkmen halor ka jingmih shakhmat jong ki kynhun seng bapher bapher ban pynkup burom kyrpang ïa u khun u jong u, uba long ruh u khun jong ka Ri Bhoi halor ka nam ka burom kaba u la ïoh lyngba ka jingtrei shitom bad minot thop ha ka sap ka phong kaba u don, kat haduh ba un ïoh ïa kata ka nam Best Goalkeeper jong ka lympung Under-19 ba la pynlong da ka SAFF.
Ha kajuh ka por, na ka liang u Bah Syiem u la kyntu ruh ym tang ïa u khun lajong, hynrei ïa kiwei de ki samla donsap jong ka Jylla ba ki dei ban buh sharud ïa ka jing -sarong, hynrei ban ïai minot bad long kiba sngewrit naba ki snem ki dangbun shakhmat ba ki lah ban kynjoh sha ki kyrdan kiba kham shalor ha ka jingim ka jongki, da kaba ong ba kam don jingmut satia lada yn pyndeng syntiew bad pynkup burom mynta, lada lashai kin jah kyrteng noh.
