Jowai, Risaw 04
Ka Nangbah Ïawmusiang ka la pynliem noh ïa ka Mosyiem Shangpung da 2-0 kol ha ka lympung ïalehkai 1st Division Football Tournament na ka bynta ka Chatister Kharkongor Memorial Trophy 2023.
Ïa kane ka lympung la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh, Jowai ha ka sngi Balang.
Ha kane ka jingïakhun baroh ar kynhun ki la pyrshang ban ïalehkai bha naduh kaba sdang, hynrei hadien shiteng kynta ka Nangbah Ïawmusiang ka la ïoh ban pynkhih jar nyngkong eh lyngba u Kynsaibor Dkhar ha ka minit kaba 34 na ka bynta ban tam shi kol haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet ka Nangbah Ïawmudiang ka la thep biang ïa ka kol kaba ar lyngba u Dawanbiang Passah ha ka minit kaba 55. Kat haduh kaba kut ka jingïalehkai ka Mosyiem Shangpung kam shym la lah ban pynphai bad ka la mad ïa ka jingshah rem.
Ka jingïakhun ha ka sngi Palei kan long hapdeng ka Sohmynting pyrshah ïa ka Khliehïongriang ha ka por 2 baje noh phai sngi.
