Shillong, Risaw 04
Ka kynhun ki ‘thei ïalehkai ka Jylla ka la pynjem khnap ia ka Rajasthan haduh shiteng dorjon (6-0 kol) na ka bynta ban bteng ïa ka jingjop ba ar ha ka Junior Girls’ National Football Championship (Tier 2).
Ha kane ka jingïakhun ba ar jong ka Group-B ha Jaipur, kane ka kynhun ïalehkai ka la lah ban ïakhun tyngeh naduh kaba sdang ha kaba ka la ïoh ïa kiba bun ki kabu ksiar.
Wat la ka la jop dangshen da 4-1 kol ïa ka Telangana, hynrei ka Meghalaya ha kaba nyng-kong ka la shem jingeh ban thep kol na ka daw ka jingïalehkai bha ki ‘thei ïalehkai ka Rajasthan.
Kane ka jingïai pyrshang ka Meghalaya ka la wan urlong hadien shi-teng kynta na ka bynta ban pynkhih jar lyngba ka Eightfulnes Shangdiar ha ka minit kaba 37. Ka Eightfulnes ka la pynbud ia ka kol kaba ar ka jong ka hashwa ban kut ka jingïalehkai jong ka kylla step kata ha ka minit kaba 45+3.
Hadien katto katne por ba la bteng biang ia ka jingiakhun jong ka kylla miet ka Meghalaya ka la pynbud biang ha ka ban thep kol lynba ka Dakani Shylla ha ka minit kaba 63 bad ia ka kol kaba saw la thep da ka Eiladki Ksoo (67). Ka Eiladki ka la pynbud ïa ka kol ba ar jong ka ha ka minit kaba 71.
ïa ka kol kaba khatduh la thep da ka Alisha Lyngdoh ha ka minit kaba 73. Haduh kaba kut ka liang pyrshah kam shym la lah ban pynphai bad ka la mad ïa ka jingshah rem ha ka Meghalaya.
Lyngba kane ka jingjop, ka Meghalaya kan pynkhreh ïa ka jingïakhun kaba lai pyrshah ïa ka Jammu & Kashmir ha ka 6 tarik mynta u bnai ha ka por 3:30 janmiet.
