Moscow, Risaw:
Ka ïingbishar jong ka Russia, ka la rai ban set patok haduh 8 snem pyrshah ia kawei ka nongthoh khubor kaba la ithuh kyrteng ka Marina Ovsyannikova, kaba la mih pyrthei hakhmat ka rynsan pathai khubor ha ryngkat ka jingthoh ‘placard’ kaba don ‘Stop the war’- kaba mut ‘sangeh noh ia ka thma’ bad ‘They’re lying to you’ kaba mut ‘ka dei tang ka jingthok bad jingpynbiej’.
Kumta, na ka liang ki bor ka aiñ jong ka Russia, ki la pynrem jur halor katei ka jingleh jong ka Ovsyannikova haba iadei bad ka jing pynsaphriang khubor lamler jongka haba iadei bad ki kam jong ka Russia bad ka tnat shipai ka Russia.
La ong ba ka Ovsyannikova, 45 snem ka rta, ka la phet noh na Russia ha ryngkat bad ka khun jongka, sha kiwei pat ki ri bym lah ban tip hadien shi snem ba ka la lait na ka jingshah kem.
Katei ka nongthoh khubor ka la pynpaw ia ka jingpyrshah jongka naduh 3 taiew hadien ba ka Russia ka leit ban hiar thma ia ka Ukraine ha ka 24 tarik u Rymphang jong u snem 2022 ba la leit.
Katba, na ka liang jong ka Russia ka la pynbna ba katei ka long tang ka ‘Special Military Operation’ lane ka jingpynkilan ia ki shipai ka Russia hapoh Ukraine.
