Shillong, Risaw 04
Ka India ka la lah ban thaw ïa ka khana pateng ne history da kaba khur haduh 18 tylli ki takma ksiar ha ka Asian Games 2023. Kane ka long ka sien kaba nyngkong ha ki 72 snem ba ka la lah ban tam na ki 16 tylli ki takma ksiar.
Wat la ha ka Sngi Ba-ar ka India ka la khur 69 tylli ki takma, hynrei ha ka sngi kaba bud ka la kynjoh sha ki 81 tylli (18 tylli ki takma ksiar, 31 ki rupa bad 32 ki rnong) na ka bynta ban ïai bat ïa ka kyrdan basaw.
Ïa kine ki takma ksiar ba la khur ha kane ka sngi ki la wan lyngba u nongkawang sum u Neeraj Chopra (men’s javelin throw), ka kynhun mareh relay jong ki shynrag 4x400m bad ka Jyothi Surekha Vennam ryng -kat ka Ojas Deotale (Mixed team compound).
Ïa ka takma rupa la khur da u Kishore Jena (javelin throw), Harmilan Bains (women’s 800m), Avinash Sable (men’s 5000m), women’s 4x400m relay team bad ka Lovlina Borgohain (boxing).
Ïa ki takma rnong la khur da u Sunil Kumar (greco-roman wres-tling), Abhay Singh/Anahat Singh (mixed team squash), Ram Baboo/ Manu Rani (35km race walk mixed team) bad ka Parveen Hooda (boxing women’s 57kg).
Kumba ka paw ka China ka dangbat ïa ka kyrdan ba nyngkong da kaba khur 301 tylli ki takma (165 ksiar, 90 rupa & 46 rnong), ïa ka kyrdan ba-ar la ïoh da ka Japan kaba la khur 131 tylli ki takma (33 ksiar, 48 rupa bad 50 rnong), katba ïa ka kyrdan balai la bat da ka South Korea kaba la khur 141 ki takma (32 ksiar, 44 rupa & 64 rnong).
