U Nongsaiñ Hima, 1984
Ha man ki khyllipmat jong ki arphewsaw kynta. Ki briew ki treikam, ki shongthait, ki rkhie – ki iam, ki pyrkhat – ki bam bad kane ka long ia baroh kawei ka pyrthei bad kumjuh ruh hangne ha ri – lum, ne ha kane ka sor Shillong. Dang step ki briew ki mih leit trei leit bylla, yn dad um ki wan pat sha la ki ïing ki ïing, bad haba peit kumne, ka i kumba baroh ka biang ka dap bad baroh ki hun ïa la ka jingim ha ki arphewsaw kynta.
Hynrei ha la shi met shi met, ki don ki jingkhuslai ki jingangnud kaba ki briew ki pyrkhat bad ïaleh ban lait na kine. Ka jingkylli kaba mih namar don ma na kine ki briew kiba ïaid kiba ïeng man la ka sngi kiba pynpyrkhat lem ïa kiwei pat, ne don ma kiba ai por tang shim init ha ka arphew kynta ban pyrkhat shaphang ka ri bad ka jaitbynriew.
Ka jubab ka long, lehse kaba sngewsih ban ong ba ym don, lait noh hangne hangtai, kiba iakren iakhana shaphang ki jingeh ba ka jaidbynriew ka iakynduh bunsien ki shu kut noh tang ha ki bad ki dorbar. Lada ka don kum kata ka jingpyrkhat, ka la dei ban paw pyrthei, ka la dei ban sawa jam, ka la dei ban mih ka jingïapanpoh la ki syngkai ban ialeh da kawei ka bor ban pyllait ïa ki jingeh kiba long dieng pyngkiang ïa ka jaidbynriew.
Lada rem ka bam ka dih, ka shu kut ang ha ka thnum ka ktuk, ka kynjik kynjak, khlem da don kano kano ka jingpyrshang ne jingïalam ban ïaleh pyrshah ia ka jingkiewdor. Lehse ki don ki jingkiewdor ki bym lkong shong hok, kiba ki nongkhaïi ki mahajon ki shu leh jubor ban bor ïa u duk u suk, hynrei kum ïa kita ym don ba wad ym don ba kylli , bad bunsien la shu myllen noh, ne hun ïa kum kine kiei kiei.Lada jakhlia ki surok bah jong ki sor, bunsien ka shu kut ang ha ka jingset ïa la ki khmut, bad ñiar ban don kiba leit sha Municipal. Lada don ka jingduna um, bunsien ka shu kut da ka jingdih noh shiteng klat ka um ha ka jaka shi klat, ne kaba sum noh shisien shi taiew ha ka jaka man ka sngi.
Lada ka bor jong ka radio station ha Shillong ka long tang shi kilo wat kaba lah ban iohsngew tang ha ka jylli kaba shiphew ne khadsan mile, ki nong Shillong ki shu hun noh tangba ki la ioh sngap ïalade, kholem da don jingpyrkhat ïa kiwei kiwei ki para ri kiba sha ki kyndong kynshrot. Lada iohi ba ka surok na khmat Civil hospital ter ter shaduh Garrison theatre ka phyrnai mynmiet da ki sharak flouesent bulb, bad ba ha dong la jong ka dum tliw tliw, ka shu kut ha ka jingrah torch light haba ïaid mynmiet myniong.
Kaei sha ka tyllep ïa u paidbah ba un shu sngap, tlip tlip ban shu long mytlop bad im ha ka mynsiem mraw ? Ka jubab ka long ba iwei pa iwei i dei ban pyrkhat, la kumno kumno shi khyllipmat hapoh ka arphewsaw kynta. Ka long kaba lehnohei ban ïakren ïa kiei kiei kiba heh, lada tang ïa kita kiei kiei kiba rit ngim pat lah ban peit phang. Bunsien ngi ïaleh ban kynjoh ïa kitei ki khlur ba phyrnai ha sahit bneng, hynrei kan kham bha lada ngi tam shuwa ïa ki mawria na ki pohjat jong ngi.
