Paris, Risaw:
Ka tyllong khubor ka iathuh ba kawei khynnah 16 snem ka la ioh ia ka jingpang ‘Coma’ naduh ba ka shah pynshitom ha ki bor pyniaid ka Tehran hadien ba la bat ia ka namar ka jingbym kup ia ka ‘hijab’. Kane ka la wanrah biang ia ka jingpynrem pyrshah ia ki pulit ka ri Iran namar ka jingpyni bor bad ka jingpyndonkam bakla ia ka bor ban pynshitom ia ki ‘riew paidbah.
Ka seng ki nong Kurd ha katei ka nongbah, ka la iathuh ba katei ka khynnah kaba la ithuh kum ka Armita Garawand, ka la mynsaw jur hadien ba ka la shah pynshitom ha ki heh pulit kynthei jong ka nongbah Tehran ha ka por ba ka la shah bat ha ki por ba la leit.
Katba na ka liang ki bor pyniaid ka Iran ki la kyntait war ia kane bad ong ba katei ka khynnah ka la kyllon iapler hi namar ka jinghiar ka snam ne ‘Blood Pressure (BP)’.
Hynrei la ong ba dei ka jingbym kohnguh bad jingiaid lait jong katei ka khynnah ia ki kyndon ba la buh hapoh ka ri bad kaba la pynlong ia ki bor pyniaid ba kin bat ia ka ha katei ka por. Kane ka khubor ka long ruh ha kum kane ka por ba ka Iran ka dang dep ban sakhi ia ka jingjur ka jingiakhih na ka jingkhlad ka samla Mahsa Amini ha katei kajuh hi ka rukom.
