Washington, Risaw:
Ka White House ha ka Sngi Balang, ka la pynpaw ia ka jingsngew khia halor ka jingpharep jong ka Canada ia ka India bad ong ruh ba katei ka jingkynnoh jong ka Canada pyrshah ia ka India, kam long shuh kaba kai bad kane ka lah ban ktah jur ia ka jing-iadei hapdeng kine ar ri hadien- habud bad kumta ruh ka long kaba kongsan ban phah wad bniah noh kloi ha ka por kaba biang.
Ka Canada ha kine ki taiew ba la leit, ka la pharep ia ka India bad dei ki briew jong ka India kiba ïadon kti lang ha ka jingpyniap ia u lehnoh Khalistan hapoh u pud- u sam jong ka ri Canada ha ki bnai ba la leit. u Hardeep Singh Nijjar, u long u heh nongialam jong ka kynhun lehnoh ba la shah khang noh- ka Khalistan Tiger Force (KTF) bad uba la shah siat iap noh ha Surrey, hapoh ka thaiñ British Columbia ha ka 18 tarik u Jylliew jong une u snem. Hynrei la ong ba ka India, naduh u snem 2020, ka la dep jer kyrteng ia u Nijjar ha bun tylli ki mukotduma ba iadei bad ki kam thombor jong katei ka kynhun lehnoh hapoh India.
Kumta, la ong ba katei ka jing pharep jong ka Canada ia ka India, ka la wanrah ia ka jingïakynad hapdeng kitei ki arliang ri, ha kaba ka India ka la beh nohkot ia u heh jong ka Canada bad ka la ai por ia u tang san sngi ba u dei ban mih noh na India tang mar ia ïohsngew ia katei ka khubor jong ka jingshah kynnoh jong ka India ha ka jingiadon kti ban pyniap ia utei u lehnoh, uba long u nongshong shnong jong ka Canada. Kumjuh ruh na ka liang jong ka Canada, ka la beh noh ia u heh jong ka India bad ka la ai por tang san sngi hi, kum shi bynta ban pynphai kylliang ia ka jingleh jong ka India. Hynrei ka daw jong ka jingbitar ka Canada lada dei ba ka India ka don kti shisha ha katei ka jingjia ruh, ka long namar ba utei u lehnoh u shah pyniap hapoh u pud- u sam jong ka ri Canada bad kumta ka Canada kam sngewtynnad bad ki bor ba nabar kin leit ban pyni bor ne ban shim ia ka rai ha ka kti jongki katba ka dang hap hapoh u pud- u sam jong ka Canada bad ka dang hap ruh hapoh ka jingkhmih jong ka Sorkar Canada.
Ha kaba sdang, ka United States ka la ong ba kan ym tuklar ne ïadon bynta eiei hapdeng ka jingïakynad jong kine ki arliang ri bad kine ki arliang ri hi ki dei ban iatrei lang bad ban iabeit hi khnang ban wanrah ia ka jingiasuk bad ka jingiadei kaba skhem hadien habud Katba. Ha kane ka por, la ong ba ka United States kam lah khlem da pynpaw ia ka jingsngew khia halor katei ka mat kaba la ktah jur ia ka jinglong jingman bad ka jingiadei hapdeng jong kitei ar ri bad kumta ka US ka la maham ruh ba katei ka jingpharep jong ka Canada ia ka India kam long shuh kaba kai ne kaba dang lah ban shim sting. Kumta ruh ka long kaba donkam ban phah wad bniah bha noh kham kloi ha ka por kaba biang, khnang ban ioh ban pynbeit bad ban wanrah noh ia ka jingiasuk hapdeng kine ar ri.
