Newberg, Risaw:
Ha kane ka jingjia la ong ba uwei u briew u la khlad noh hadien ka jingleit hap bakla jong katei ka liengsuiñ rit ha ka tnum jong ka ïingmala hapoh ka nongbah Newberg jong ka United States. Wat la ki tnat iarap bad ki kynhun pynlip ding ki la leit poi mar-mar sha katei ka jaka tang mar ia ioh khubor halor katei ka jingjia hynrei kim lah shuh ban pyllait im ia utei uba la ngat ha katei ka apot. Ka tnat pynlip ding ka la maham ia ki paidbah ba kin ym pat leit tur sha katei ka jaka katba ka jinglong-jingman kam pat biang bad katba ki dang pynkhuid bad weng ia ki kynrum- kynram na katei ka jaka ba julor.
Katkum ka video ba la saphriang ha ki Social Media, la iohi ia katei ka liengsuiñ kaba la leit hap beit-beit sha katei ka iing bad ba la ithuh ia ka jingpulom treikam jong katei ka liengsuiñ naduh ka por ba ka dang don halor suiñ shuwa ba kan leit hap noh syndon.
Ha katei ka video, la iohi ia katei ka liengsuiñ naduh ka por ba ka dang rit bad kham sha jngai hynrei la iohi pat ba ka la leit suh beit-beit sha katei ka iing kaba don ha katei ka thaiñ ha ryngkat ki thapniang kiba la kem ding.
La ong ba ki don 2 ngut ki nongshong ha katei ka liengsuiñ bad uwei na ki u la khlad noh hashen. Katba utei uwei pat u la mynsaw jur bad la pynkit ia u sha ka jaka sumar kaba don ha katei hi ka nongbah.
Ia mynta, ym pat lah ban batai bniah ia ka daw jong ka jingkem ding bad jingsangeh treikam jong katei ka liengsuiñ ha katei ka jingjia.
