Shillong, Risaw 04
Shi sngi shwa ban mih na ka nongbah ban leit ïashim bynta ha ka lympung ïalehkai jong ka U-19 Women’s One Day Tournament, ka synjuk ïalehkai jong ka Meghalaya Cricket Association (MCA) ka la kitbok kitrwiang ïa ki ‘thei ïalehkai ka Jylla ha ka sngi Balang ha kane ka nongbah.
Ïa kane ka lympung yn pynlongha Surat kaba ha Gujarat naduh ka 8 tarik mynta u bnai. Kane ka kynhun kan ïakhun nyngkong pyrshah ïa ka Vidarbha ha ka 8 tarik mynta u bnai, ha kaba yn bud pat sa ka jingïakhun pyrshah ïa ka Pondi-cherry ha ka 10 tarik, Manipur ha ka 12 tarik, Tamil Nadu ha ka 14 tarik bad ïa ka Maharashtra ha ka 16 tarik.
Ki ‘thei ïalehkai kiba ka MCA ka la ïoh ban jied ïa ki ban mihkhmat sha kane ka lympung ki dei kiba la dep ban mihkhmat ïa la ki jong ki synjuk ïalehkai kriket ba don ha ka distrik jong ka Jylla, kata ha ka U-19 Girls’ Inter District Cricket Tournament.
U Secretary ka MCA u Bah Gideon Kharkongor u la ai mynsiem ïa ki ‘thei ïalehkai ki ban mihkhkmat ïa ka Jylla ha kane ka kynti kaba mynta, da kaba u la ïai ban ïa ki ba kim dei ban tieng. “Kum ki nongpynïaid ka MCA mynta ka kynti ka shaniah bad kyrmen ba kane ka kynhun ki ‘thei ïalehkai namar mynta ki la long kiba kynsai bad kiba don ïa ka sap ba kyrpang.”
Katba na ka liang ka jong u President ka MCA u Naba Bhatacharjee u la ai mynsiem ïa ka kynhun ba kim dei ban sngewduh mynsiem, hadien ba la pynïakap lang ïa ki bad ki jylla ïalehkai ba khlaiñ bor kum ka Tamil Nadu ne Maharashtra, pynban u ong ba u shaniah tylli ha kane ka kynhun ba kan ïakhun tyngeh bad ïalehkai bha ha kane ka kynti kaba mynta.”
Ki kyrteng ki nongïalehkai ki ban mihkhmat ïa ka Meghalaya ki long ka Dianchidora N. Sangma, Dubleen D. Nengnong, Indariakor Kharwanñiang, Fennysha Nongrum, Ankita Sharma, Kambesa Agitok, Abiezer Kharsyiem, Janicka R. Marak, Monica Singh, Emisakani Warjri, Rikmanchi M. Sangma, Jayshree Singh, Awesa G Momin, Jaylynn R. Marak, Natasha Rabha.
Ki nongai jinghikai ïa kane ka kynhun ki kynthup ia ka Ranjana Yadav (head coach), Marty Mustafa (assistant coach), Helyna D. Sangma (trainer), Lucky Mary Marbaniang (physio), Manager Kong Baiahun Mylliemngap.
